لاہور(این این آئی) پنجاب اسمبلی میں قائد حزب اختلاف حمزہ شہباز نے کہا ہے کہ رانا ثنا اللہ کی گرفتاری ایک تماشہ ہے، سب اس پر ہنس رہے ہیں، ملک میں مہنگائی عروج پر ہے، حکومت کو سیاسی انتقام سے بالاتر ہوکر سامنے آنا چاہیے، عمران خان اپنی فکرکریں اور حکومت ایسے بیج نا بوئے جس کو کاٹنا مشکل ہوجائے۔لاہور کی احتساب عدالت میں پیشی کے موقع پر میڈیا سے غیر رسمی

گفتگو کرتے ہوئے حمزہ شہباز نے کہا کہ رانا ثنااللہ کی گرفتاری نہیں، یہ قوم کے ساتھ تماشہ اور مذاق ہے، پوری قوم اس مذاق پر ہنس رہی ہے لیکن یہ تماشہ زیادہ دیر تک نہیں چلتا، قوم سب جانتی ہے کہ رانا ثنااللہ پر کیا کیس بنایا گیا۔انہوںنے کہاکہ 72سال بعد بھی بھینس چوری اور منشیات کے مقدموں کا سلسلہ بند نہیں ہوسکا، حکومت کو سیاسی انتقام سے بالاتر ہوکر سامنے آنا چاہیے، حکومت ایسے بیج نا بوئے جس کو کاٹنا مشکل ہوجائے، رانا ثنااللہ کے خلاف جب کچھ نا ملا تو منشیات کا مقدمہ ڈال دیا، منشیات کے الزام کے بعد کوئی کسر رہ نہیں گئی۔انہوں نے کہا کہ یہ پیشیوں کا سیزن ہے، پیشیاں مذاق بنی ہوئی ہیں، قوم دیکھ رہی ہے، قوم پر مہنگائی کا طوفان امڈ آیا ہے، جو مشکل وقت قوم پر آیا ہے، اللہ تعالی اسے دور کرے، اپوزیشن عوام کے ساتھ کھڑی ہے، عوام کی زندگی قیامت بنا دی گئی ہے۔حمزہ شہباز نے مزید کہا کہ عمران خان کی حالت قابل ترس ہے وہ بغض اور حسد میں گرفتار ہیں، یہ دن تھوڑے ہیں ظلم کی رات ڈھل جائے گی، مجھے اپنی فکر نہیں اللہ ملک کی خیر کرے، پروڈکشن آرڈر نہ ملنے کی کوئی پرواہ نہیں، عمران خان اپنی فکر کریں۔