اسلام آباد (این این آئی)پاکستان پیپلزپارٹی کی مرکزی سیکریٹری اطلاعات ڈاکٹر نفیسہ شاہ نے کہا ہے کہ الیکشن کمیشن کے گوشواروں کے مطابق بنی گالا کا محل عمران خان کو تحفے میں ملا، سپریم کورٹ کو 2017 میں عمران خان نے بتایا کہ بنی گالا کا محل انہوں نے کرکٹ کی آمدنی سے بنایا۔ ایک بیان میں نفیسہ شاہ نے کہاکہ مئی 2017 میں عمران خان کا ٹویٹ موجود ہے جس میں انہوں نے لندن فلیٹ بیچ کر بنی گالا محل کی تعمیر کا بتایا۔
انہوں نے کہاکہ یہ آناًفاناً کیا ہوا کہ اپنی کمائی سے بنایا گیا بنی گالا محل عمران خان کو اچانک تحفے میں مل گیا۔انہوں نے کہاکہ سپریم کورٹ سے الیکشن کمیشن آتے آتے بنی گالا محل محنت کی کمائی سے تحفہ کیسے ہوگیا؟ ۔انہوں نے کہاکہ کہیں ایسا تو نہیں کہ سپریم کورٹ میں عمران خان نے بنی گالا محل کے تحفے میں ملنے کا جھوٹ بولا ہو؟ ۔انہوں نے کہاکہ عمران خان کو چاہئے کہ اپنے جھوٹ یاد رکھنے کے لئے ایک سیکریٹری رکھ لیں۔
