لاہور(پ ر) وزیراعلیٰ سردار عثمان بزدارنے صوبہ بھر میں نہری پانی چوری کرنے والوں کے خلاف بلا امتیاز کریک ڈاؤن کاحکم دیا ہے اور اس ضمن میں محکمہ آبپاشی کو ضروری ہدایات بھی جاری کر دی ہیں -وزیراعلیٰ کی ہدایت پر نہری پانی چوری کرنے والے افراد کے خلاف خصوصی مہم کا آغاز کردیا گیاہے

اور اب تک پانی چوری کے 2995 واقعات پر کارروائی کی گئی ہے اورپانی چوری کرنے والے افراد کے خلاف 1188 ایف آئی آر درج کی گئی ہیں جبکہ 381افرادکو پانی چوری کے الزام میں گرفتار کیا گیاہے-وزیراعلیٰ سردار عثمان بزدار نے کہاہے کہ نہری پانی چوری کرنا قابل سزا جرم ہے لہذا نہری پانی کی چوری روکنے کے لئے موثر اقدامات تسلسل کے ساتھ جاری رکھے جائیں اورپانی چوری کرنے والے عناصر کسی رعایت کے مستحق نہیں -انہوں نے کہاکہ پانی چوری میں ملوث افراد خواہ کتنا ہی با اثر کیوں نہ ہو، اس کے خلاف بلا تفریق کارروائی ہوگی- انہوں نے مزید ہدایت کی کہ ڈویژن اور ضلع کی سطح پر انتظامیہ اور پولیس حکام پانی چوری روکنے کی مہم کو موثر انداز سے آگے بڑھائیں اورتحصیل کی سطح پر قائم کمیٹیوں کو بھی متحرک کیا جائے اورپانی چوری کے خلاف اقدامات کی رپورٹ وزیراعلیٰ آفس پیش کی جائے-انہوں نے کہاکہ تاریخ میں پہلی بار نہروں کے آخر تک پانی کی دستیابی یقینی بنائی جا رہی ہے اور ہر کاشتکار کو پانی کی فراہمی یقینی بنائی جائے گی-وزیراعلیٰ نے محکمہ آبپاشی کی جانب سے نہری پانی کی چوری روکنے کے لئے کئے جانے والے اقدامات کی تعریف کی ہے-