لاہور(آن لائن) وزیراعظم کی معاون خصوصی اطلاعات فردوس عاشق اعوان نے کہا ہے کہ فواد میرا بھائی ہے وہ نو بال پر چھکے مارتا ہے، فواد چودھری کو سمجھائیں گے کہ کریز کے اندر کھیلے، کریز سے باہر نکل کر چھکے نہ مارے،اگلے سال کوشش ہو گی ملک میں ایک عید ہو، سائنس اور ٹیکنالوجی سے بھی مدد لی جائے گی۔ معاون خصوصی اطلاعات فردوس عاشق اعوان نے لاہور پریس کلب میں میٹ دی پریس میں اظہار خیال کرتے ہوئے کہا کہ دس سال ہمیں دیوار سے لگائے رکھا گیا۔
ماضی میں پنجاب میں ترقی کا سفر محدود کردیا گیا۔ ماضی کی حکومتوں نے پنجاب کے دوسرے شہروں کو نظر انداز کیا۔ انہوں نے کہا کہ سیاست میں مثبت اور منفی پہلو ملکی ترقی پر ضرور ا ثر انداز ہوتے ہیں۔سیاست میں مخالفت کا عنصر بہتری کی علامت سمجھتی ہوں۔ سیاسی سوچ اورانقلاب کا قلعہ ہے۔ سیاست میں جیتنے یا منتخب ہونے والا عوام کا نمائندہ ہوتا ہے۔فردوس عاشق اعوان نے کہا کہ منتخب وزیراعظم یا وزیراعلیٰ کو غلط القابات سے نہیں پکارنا چاہیے۔ کرسی آنی جانی چیز ہے، عہدے کی قدر اور عزت کی جانی چاہیے۔ ہم جمہوری سوچ والے ہیں۔ پتہ ہے کہ ووٹ کی عزت کیا ہوتی ہے۔ فردوس عاشق اعوان نے کہا کہ عمران خان کوعوامی شعور اجاگر کرنے کا کریڈٹ جاتا ہے۔ ہم بھی انسان ہیں، کوتاہیاں ہم سے بھی ہو سکتی ہیں۔ انہوں نے ایک سوال پر کہا کہ فواد میرا بھائی ہے وہ نو بال پر چھکے مارتا ہے، فواد چودھری کو سمجھائیں گے کہ کریز کے اندر کھیلے، کریز سے باہر نکل کر چھکے نہ مارے،اگلے سال کوشش ہو گی ملک میں ایک عید ہو، سائنس اور ٹیکنالوجی سے بھی مدد لی جائے گی۔ رویت ہلال کمیٹی کی از سرنو تشکیل کی ضرورت ہے۔ رویت ہلال کمیٹی کو خیبرپختونخواہ سے آنیوالی شہادتوں کو بھی دیکھنا چاہیے۔مزید برآں ڈاکٹر فردوس عاشق اعوان نے کہا کہ وزیراعظم عمران خان نے بے کس اور بے بس قیدیوں کے جرمانے ادا کرا کر 820 خاندانوں کو عید کا تحفہ دیا ہے، وزیر اعظم عمران خان کی ہدایت پر قیدیوں کی رہائی حکومتی احساس میں تبدیلی کی علامت ہے۔ منگل کو اپنے ٹویٹ میں وزیراعظم کی معاون خصوصی ڈاکٹر فردوس عاشق اعوان نے کہا کہ محض جرمانہ ادا نہ کرنے کی استطاعت پر قیدیوں کو عقوبت سے نجات دلانا اسلام کے احکامات پر عمل ہے۔
