اسلام آباد (نیوز ڈیسک)پیپلز پارٹی وسطی پنجاب کے صدر قمر زمان کائرہ کو جواں سال بیٹے کی ٹریفک حادثے میں جاں بحق ہونے کی خبر پریس کانفرنس کے دوران دی گئی۔ جمعہ کو پاکستان پیپلز پارٹی کا اجلاس سابق صدر آصف علی زر داری اور بلاول بھٹو زر داری کی سربراہی میں ہوا۔اجلاس کے دور ان پیپلز پارٹی کے رہنماؤ ں نے پریس کانفرنس سے خطاب کیا۔ترجمان پیپلز پارٹی کے مطابق بیٹے کے جاں بحق ہونے کی اطلاع ملتے ہی قمر زمان کائرہ
پریس کانفرنس چھوڑ کر لالہ موسٰی روانہ ہو ئے۔قمر زمان کائرہ کا بیٹا گورنمنٹ کالج لاہور میں زیر تعلیم تھا اور ان کا انتقال لالہ موسیٰ میں ہونے والے ٹریفک حادثے میں ہوا۔پیپلز پارٹی کے رہنما قمر زمان نے بیٹے کی موت کی خبر سننے پر نہایت ضبط کا مظاہرہ کرتے ہوئے شکریہ کے ساتھ نیوز کانفرنس ختم کی اور اپنے گھر فوراً فون کیا جس پر انہیں بیٹے کی موت کی تصدیق ہوئی لیکن اس موقع پر انہوں نے اپنے آپ پر ضبط کیا اور آبدیدہ نہ ہوئے۔
