لاہور(این این آئی) پنجاب کے تین مزید شہروں لیہ، بھکر اور قائدآباد (ضلع خوشاب) میں نیا پاکستان ہائوسنگ سکیم شروع کرنے کا فیصلہ کیا گیاہے۔ اگلے چند روز میں اس حوالے سے عوام سے درخواستیں طلب کرنے کا آغاز کر دیا جائے گا۔

یہ فیصلہ وزیر ہائوسنگ و اربن ڈویلپمنٹ میاں محمودالرشید کی زیرصدارت پنجاب ہائوسنگ اینڈ ٹائون پلاننگ ایجنسی (پھاٹا) کی گورننگ باڈی کے اجلاس میں کیاگیا۔ ڈی جی پھاٹا لیاقت چٹھہ اور دیگر اراکین اجلاس میں شریک تھے۔ میاں محمودالرشید نے اس موقع پر ہدایت کی کہ ان تینوں شہروں میں نیا پاکستان ہائوسنگ سکیم کے تحت کم لاگت گھروں کی تعمیرکے آغاز کے حوالے سے انتظامات کو حتمی شکل دی جائے۔ اجلاس کے دوران لاہور میں نیا پاکستان ہائوسنگ سکیم کی مجوزہ سائٹس کے حتمی انتخاب کیلئے ایک 6رکنی کمیٹی بھی تشکیل دی گئی جو تمام مجوزہ سائٹس کا دورہ کرکے اپنی رپورٹ پیش کرے گی، مزیدبراں پدری ضلع راولپنڈی میں نئے شہر کے قیام کے حوالے سے رپورٹ تیار کرنے کیلئے بھی کمیٹی کا قیام عمل میں لایاگیا۔ یہ دونوں کمیٹیاں ایک ہفتے میں اپنی رپورٹ پیش کریں گی۔ میاں محمود الرشید نے اس موقع پر کہاکہ پھاٹا گورننگ باڈی کا اجلاس ہر پندرہ روز کے بعد بلایاجائے گا تاکہ نیاپاکستان ہائوسنگ سکیم کے پراجیکٹس پر کام کی رفتار کو مزید تیز کیاجاسکے۔ انہوں نے پھاٹا حکام کو ہدایت کی کہ پھاٹا بائی لاز میں ترامیم کے کام کو جلداز جلد مکمل کیا جائے تاکہ اس ضمن میں عوام اور بلڈرز کو ریلیف فراہم کیاجاسکے۔ اجلاس کے دوران نیاپاکستان ہائوسنگ سکیم کے ملتان پراجیکٹ کے ڈیزائن کے حوالے سے بریفنگ بھی دی گئی۔

موضوعات:نیا پاکستان ہائوسنگ سکیم