کراچی (این این آئی)آل پاکستان موبائل فون ٹریڈرز ایسوسی ایشن کے صدر محمدرضوان نے ڈیلرز کے معاشی قتل عام کے خلاف 4،مئی بروز ہفتہ ملک گیر ہڑتال اور زبردست احتجاجی تحریک کا اعلان کیا ہے۔انہوں نے اپنے ایک احتجاجی بیان میں واضح کیاہے کہ ڈیلرز کا معاشی استحصال کسی صورت قابل قبول نہیں ہے،بڑی کمپنیوں کے مفادات کی خاطر عام ڈیلرز کو بیروزگار کرنے کی اجازت ہرگز نہیں دیں گے۔انہوں نے کہا کہ PTAکی جانب سے عدالت عالیہ کے حکمنامہ کی نافرمانی کرنے اور اچانک شہریوں اور تاجروں کے موبائل فون بند کیے جانے

کے غیرقانونی عمل سے ناصرف کسٹمرزاور تاجروں میں تصادم کی کیفیت پیدا ہوگئی ہے بلکہ عام شہریوں اور تاجروں میں سخت اشتعال اور بے چینی پائی جارہی ہے،جس سے ملک بھر میں بدامنی کے سنگین خدشات جنم لینے لگے ہیں۔محمدرضوان نے کہا اگر حکومت نے PTAکی غلط روش کے باعث اس بگڑتی صورتحال کا بروقت نوٹس نہ لیا تو نتائج کی ذمہ دار وہ خود ہوگی۔انہوں نے کہا پہلے مرحلے میں ملک گیرہڑتال اور احتجاجی مظاہرے کیے جائیں گے،ڈیلرز کا معاشی قتل عام بند نہ کیا گیا تو لاکھوں موبائل فون ڈیلرز سڑکوں پر آنے پر مجبور ہوں گے۔