لاہور(سی پی پی )پیراگون ہائوسنگ سکینڈل میں مسلم لیگ (ن) کے رہنما خواجہ برادران کے جوڈیشل ریمانڈ میں 14 دن کی توسیع کر دی گئی۔لاہور کی احتساب عدالت میں مسلم لیگ نون کے رہنما اور سابق وزیر ریلوے خواجہ سعد رفیق اور ان کے بھائی خواجہ سلمان رفیق کے خلاف پیرا گون ہائوسنگ سوسائٹی کیس کی سماعت ہوئی۔
عدالت نے خواجہ برادران کے ریمانڈ میں مزید 14 دن کی توسیع کرتے ہوئے انہیں 16 مئی کو دوبارہ پیش کرنے کا حکم دیدیا۔ خواجہ برادران سے اظہار یکجہتی کے لیے لیگی کارکنان کی بڑی تعداد عدالت کے باہر موجود تھی اور خواجہ برادران کی رہائی کے لیے نعرے لگا رہے تھے۔ خواجہ برادران کی حمایت میں آئے لیگی کارکنان نے حکومت کے خلاف بھی احتجاج کیا۔ خواجہ برادران کی عدالت میں پیشی کے موقع پر عدالت کے اندر اور باہر سیکیورٹی کے سخت انتظامات کیے گئے تھے جب کہ عدلت کے اطراف پولیس کی اضافی نفری تعینات تھی۔ کیس کی سماعت کے دوران کمرہ عدالت میں کسی بھی غیر متعلقہ شخص کے داخلے کی اجازت نہیں تھی۔ مسلم لیگی رہنما خواجہ سلمان رفیق قومی اسمبلی اجلاس میں شرکت کے لیے اسلام آباد میں موجود ہیں جس کی وجہ سے انہیں عدالت میں پیش نہیں کیا گیا۔ خواجہ برادران پیراگون ہائوسنگ اسکینڈل میں گرفتار ہیں اور ان پر پیراگون ہائوسنگ اسکینڈل سمیت تین مقدمات درج ہیں۔لیگی رہنما سلمان رفیق نے میڈیا سے گفتگو کرتے ہوئے کہا ہم پہلے بھی کہتے تھے کہ سونامی تباہی کا نام ہے، بدقسمتی سے پاکستان پر منحوس حکمران آ کر بیٹھ گئے، موجودہ حکمرانوں کی وجہ سے ملکی معیشت تباہ ہو چکی ہے۔
