اسلام آباد(مانیٹرنگ ڈیسک)پشاور کا رہائشی اکبر شاہ گھر گھر جا کر قرآن پاک کے ضعیف نسخے اور اوراق جمع کر کے دوسروں کیلئے مثال بن گیا ،میڈیا رپورٹس کے مطابق کلام الٰہی کی اس خدمت کو سرانجام دیتے ہوئے اکبر شاہ کو 29 سال ہو گئے ہیں۔

اکبر شاہ کا کہنا ہے کہ میں خود قرآن پاک نہیں پڑھ سکا اور نہ ہی اسے سمجھ سکتا ہوں اسی لیے قرآن پاک کے لیے اس طرح خدمت انجام دے کر اللہ تعالیٰ کی اس کتاب سے اپنی محبت کی پیاس بجھاتا ہوں۔اکبر شاہ نے کہا کہ میرے لیے صرف اسی کام میں سکون ہے دوسری کسی چیز میں سکون نہیں ہے۔ انسان ساری زندگی سکون کے پیچھے بھاگتا ہے لیکن اللہ کا شکر ہے کہ اللہ نے میرے لیے اس کام میں سکون رکھا ہے۔ میں قرآن پاک کے ضعیف نسخے اور اوراق کو اکٹھا کرتا ہوں اور شہر میں موجود گودام میں رکھتا ہوں اور پھر ان تمام نسخوں اور اوراق کو جمرود لے جاتا ہےجہاں ان کی تدفین کے لیے دس گز کی قبر کھودی جاتی ہے اور پھر ان اوراق اور نسخوں کو دفنا دیا جاتا ہے۔ اکبر شاہ نے کہا کہ وقت گزرنے کے ساتھ ساتھ میرے ساتھ اس نیک کام میں مدد کرنے والے شہریوں کی تعداد میں بھی اضافہ ہو گیا ہے۔ شہریوں کا کہنا ہے کہ ہمیں بھی اکبر شاہ کی مدد کر کے سکون قلب حاصل ہوتا ہےاور ہم آگے مستقبل میں بھی یہ سلسلہ جاری رکھیں گے۔