اسلام آباد (این این آئی) قومی خزانے پر ہاتھ صاف کرنے والوں سے چوری کا مال نکلوانے کا عمل تیز ہوگیا ،وزارت مواصلات کو بڑی کامیابی مل گئی ،سپیشل آڈٹ کے نتیجے میں پکڑے جانے والے 353 ملین روپے قومی خزانے میں واپس کرادیئے گئے ۔
جمعرات کو ایک بیان میں وزیرمواصلات نے کہاکہ قوم کو اہم خوشخبری دینا چاہتا ہوں۔مراد سعید نے کہاکہ 445 کروڑ کے بعد چوری ہونے والے 353 ملین روپے بھی چوروں سے نکلوا کر قومی خزانے میں واپس جمع کروادیئے۔ انہوں نے کہاکہ قلات،کوئٹہ،چمن روڈ کی تعمیر میں کرپشن کرنے والوں کو پکڑا جاچکا ہے۔انہوں نے کہاکہ گوادررتو ڈیرو روڈ کی تعمیر کے دوران ڈاکہ ڈالنے والوں پر بھی ہاتھ ڈال چکے ہیں۔انہوں نے کہاکہ دونوں منصوبوں میں 353 ملین روپے کی خرد برد کے مصدقہ شواہد ملے تھے۔انہوں نے کہاکہ وزارتِ مواصلات کی کوششوں سے دونوں منصوبوں میں کرپشن کرنے والے عناصر اپنے جرم کا اعتراف کرچکے ہیں۔انہوں نے کہاکہ دو دیگر منصوبوں سے چرائے گئے 155 کروڑ روپے تک بھی جلد پہنچ جائیں گے۔انہوں نے کہاکہ وزارت سنبھالنے سے لیکر اب تک چوری شدہ 445 کروڑ قومی خزانے میں واپس جمع کروا چکے ہیں۔انہوں نے کہاکہ وزارت ملی تو مجموعی طور پر 5 منصوبوں کے سپیشل آڈٹ کا فیصلہ کیا۔انہوں نے کہاکہ قوم کو پیشہ لوٹنے والوں سے بالکل کوئی رعایت نہیں برتیں گے۔انہوں نے کہاکہ جس جس نے بھی خزانے پر ہاتھ صاف کئے ہیں اس اس کو قوم کا مقدس پیسہ واپس کرنا ہوگا۔
