پشاور(این این آئی) پشاور میں آندھی اور طوفان کے باعث مختلف حادثات میں ایک بچہ جاں بحق جبکہ تیرہ افراد زخمی ہوگئے۔ متعدد علاقوں کو بجلی کی فراہمی بھی معطل ہوگئی ۔پشاوراور گرد ونواح میں تیز اندھی اور طوفان نے تباہی مچا دی۔ریسکیو اورہسپتال انتظامیہ کے مطابق اصہاب بابا میں دیوار گرنے کے باعث دس سالہ ابراہم کو زخمی حالت میں لیڈی ریڈنگ اسپتال منتقل کیا گیا جہاں پر دوران علاج دم توڑ گیا۔ طوفان کے باعث مختلف علاقوں میں زخمی ہونے والے تیرہ افراد کو بھی
لیڈی ریڈنگ اسپتال منتقل کیا گیا جن میں سے بیشتر کو طبی امداد کی فراہمی کے بعد فارغ کردیا گیا ہے۔ شدید آندھی اور طوفان کے باعث مختلف علاقوں میں بجلی کا نظام بھی متاثر ہوا ہے جس کے باعث بجلی کی کی فراہمی معطل ہے۔ صوابی کی تحصیل ہیڈکوارٹر رزڑ کے گنجان آباد شہر یارحسین میں شدیدآندھی کے دوران مکان کی چھت گرجانے سے دوبہنیں جاں بحق جبکہ ماں سمیت تین بہنیں شدیدزخمی ہوگئیں ،زخمیوں کو مردان اورکرنل شیرکلے ہسپتال منتقل کردیاگیا ۔پولیس تھانہ یارحسین کی رپورٹ کے مطابق یارحسین کے محلہ کریم دادخیل میں افتخارحسین کی گھرمیں واقع کمرے کی چھت شدیدآندھی اورطوفان کے دوران گرگئی جس کی نتیجے میں کمرے میں موجودماں اپنی دیگر چاربیٹیوں سمیت شدیدزخمی ہوگئیں زخمیوں کومردان اورکرنل شیرہسپتال منتقل کردیاگیاجن میں سے دوشدیدزخمی بہنیں مسماۃ (س)اورمسماۃ (س)کرنل شیرہسپتال میں زخموں کی تاب نہ لاکر چل بسی شدیدمجروح ماں اور ان کی دوبیٹیان مردان اورکرنل شیرہسپتال کو منتقل کردیاگیا۔ایس ایچ او تھانہ یارحسین نیازعلی خان بمع پولیس نفری موقع پر پہنچی گاؤں کے لوگوں نے مکان کاملبہ ہٹاکر زخمیوں کونکالااورفوری طورپرہسپتالوں کومنتقل کردیاگیا۔گھر کاسربراہ افتحار حسین اور دیگراہلِ خانہ معجزانہ طورپر بچ گئے جاں بحق ہونے والوں میں فرسٹ ائیر کی ایک طالبہ بھی شامل ہے۔
کوہاٹ ڈویژن کے طول وعرض میں طوفانی بارش نے تباہی مچادی۔ دیوار گرنے کے نتیجے میں کم از کم ایک بچی جاں بحق جبکہ کئی جانور بھی ہلاک و زخمی ہوگئے۔ متعدد تناور درخت جڑ سے اکھڑ گئے اور کئی علاقوں میں بجلی کا نظام درہم برہم ہوگیا۔منگل کے روز بعد از سہ پہر آسمان پر خطرناک کالی گھٹائیں چھا گئیں جس کی وجہ سے دن کی روشنی میں اندھیرا چھا گیا اور موسم انتہائی خوفناک منظر پیش کرنے لگا۔ کوہاٹ ڈویڑن کے بیشتر شہری اور دیہی علاقوں میں گرد و غبار کا تیز طوفان آیا اور
بعد ازاں کہیں ہلکی اور کہیں تیز بارش ہوئی۔ طوفانی بارش کے باعث ملحقہ قبائلی سب ڈویڑن درہ آدم خیل میں متعدد درخت گرگئے جبکہ کئی گھروں کی کچی دیواریں گرگئی جس کے باعث مویشی کے ہلاک و زخمی ہونے کی اطلاعات ہیں۔ کوہاٹ کے نواحی علاقے کوٹ میں ایک دیوار گرنے کی زد میں آکر ایک سات سالہ بچی جاں بحق ہونے کی اطلاع ملی ہے۔ کوہاٹ سمیت ہنگو اور کرک کے پیشتر علاقوں میں بھی طوفانی بارش کی اطلاعات موصول ہوئی ہیں تاہم فوری طورپر مزید جانی و مالی نقصانات کی رپورٹ نہیں ملی۔طوفانی بارش کے نتیجے میں کئی علاقوں میں بجلی کا نظام بھی درہم برہم ہوگیا۔ آدھر بارش کے باعث چند روز سے جاری گرم موسم خوشگوار ہوگیا۔
