راولپنڈی (این این آئی)سابق وزیر داخلہ چوہدری نثار علی خان نے کہاہے کہ حکومت اپنے آپ کو احتساب کے عمل سے مکمل طور پر الگ کرے۔ میڈیا سے گفتگو کرتے ہوئے سابق وزیرداخلہ چوہدری نثارنے کہا کہ میں ایسا کوئی کام نہیں کرتا جومیرے ضمیر پر بوجھ ہو۔ انہوں نے کہاکہ ووٹ دینے والے اطمینان رکھیں ان کے ساتھ دونمبری نہیں ہوگی۔چوہدری نثار نے کہا کہ کبھی صوبائی اسمبلی کے لیے ووٹ نہیں مانگا، اس بار بھی لوگوں نے ووٹ دئیے لیکن کیا ہوا؟
اس کی کبھی وضاحت کروں گا۔انہوں نے کہاکہ نوازشریف کو مشورہ دیا لیکن انہوں نے نہیں مانا، اس کے بعد مجھے ٹکٹ نہیں دیا گیا، مخالف جماعت سے عہدوں کی پیشکش ہوئی لیکن میں نے یہ کام نہیں کیا۔انہوں نے کہا کہ اپنے علاقے کے لوگوں کے بغیرکہے کام کیے، ان کے فون اور خطوں پر کام ہوئے۔ انہوں نے کہاکہ میرے مخالفین سے بھی پوچھیں کہ انہوں نے اپنے حلقے میں کیا کام کیا ہے۔ انہوں نے کہاکہ علاقے کو بجلی دی، سڑکیں بنوائیں اور پھر ان کی مرمت بھی ہوتی رہی۔چوہدری نثارنے کہا کہ مجھ سے پارٹی بدلنے کا گلہ نہیں ہے، خدمت نہ کرنے کا نہیں ہے بلکہ اس بات کا شکوہ کیا جاتا ہے کہ علاقے میں فاتحہ خوانی کیلئے کبھی نہیں آیا۔انہوں نے کہاکہ احتساب کا سلسلے کو حکومت نے خود متنازعہ بنایا ہے،نیب ایک خود مختار ادارہ ہے ،اگر وہ آزادی سے کام کرنے دیتی تو آج یہ حالات نہیں ہوتے۔ انہوں نے کہاکہ آپ سب کو چور اور ڈاکو سمجھتے ہیں احتساب ہونا چاہیے لیکن سیاست کی نظر نہیں ہونا چاہیے۔ انہوں نے کہاکہ حکومت اپنے آپ کو احتساب کے عمل سے مکمل طور پر الگ کرے۔ انہوں نے کہاکہ واضح کر دوں کسی عہدے کا امیدوار نہیں ،پچھلے چھے ماہ میں بہت آفر ٹھکرا دیں۔ انہوں نے کہاکہ کہتا رہا ہوں اس ملک کو بہت سنجیدہ خطرات کا سامنا ہے،ہم ان خطرات سے بے خبر ہیں۔ انہوں نے کہاکہ سات ارب روپے روزانہ قرض لے کر ملک چلا رہے ہیں،یہ قرضوں کا گرداب ہے مگر سب اسی طرح چل رہے ہیں،اس وقت ملک کو خطرات ہیں۔
انہوں نے کہاکہ بھارت میں گائے کے پیچھے مسلمانوں کو قتل کر دیا جاتا ہے،اس کا مقابلہ کرنے کیلئے قوم کو یکجا کرنے کی ضرورت ہے،جتنی تقسیم آج ہے اتنی شاید کبھی نہیں تھی۔ انہوں نے کہاکہ بلاول کا نہیں کہہ سکتا کہ وہ آئینگے یا نہیں اور کنٹینر ملے گا یا نہیں۔انہوں نے کہاکہ عمران خان کو مشورہ دیتا ہوں خدا کے واسطے غیر روایتی وزیراعظم بنیں۔ انہوں نے کہاکہ زمہ داری عمران خان اور انکے ٹیم کی ہے قوم کو سہانے خواب نہ دکھائیں۔انہوں نے کہاکہ حمزہ شہباز والا معاملہ حکومت نے خود متنازعہ بنایا۔ انہوں نے کہاکہ میں کسی ایمپائر کی انگلی کو نہیں مانتا انہوں نے کہاکہ میرے مستقبل بارے میں بھی شیخ رشید سے پوچھ لیجیے گا،کچھ ایسے جواب ہیں جو نہیں دینا چاہتا۔
