اسلام آباد (این این آئی) وزیر خارجہ شاہ محمود قریشی نے کہا ہے کہ امریکہ، پاکستان اور بھارت کے مابین تمام تصفیہ طلب امور پر مذاکرات کے دوبارہ آغاز کیلئے اپنا کردار ادا کرے۔ منگل کو امریکی وزیر خارجہ مائیکل پومپیو اور وزیر خارجہ مخدوم شاہ محمود قریشی کے مابین ٹیلیفونک رابطہ ہوا جس میں دو طرفہ تعلقات اور خطے میں امن و امان کی صورتحال پر تبادلہ خیال کیاگیا ۔دونوں وزرائے خارجہ نے جنوبی ایشیا میں امن و استحکام کیلئے کشیدگی کے خاتمے کو ضروری قرار دیا ۔
وزیر خارجہ مخدوم شاہ محمود قریشی نے نیشنل ایکشن پلان کے تحت پاکستان کیطرف سے کیئے گئے اقدامات سے امریکی وزیر خارجہ کو آگاہ کیا ۔ وزیر خارجہ نے کہاکہ خطے میں امن و استحکام کے فروغ کیلئے پاک امریکہ باہمی تعلقات نہایت اہمیت کے حامل ہیں ۔مخدوم شاہ محمود قریشی نے کہاکہ خطے میں کشیدگی کے خاتمے کیلئے امریکہ کا کردار قابل ستائش ہے ۔ وزیر خارجہ مخدوم شاہ محمود قریشی نے، امریکی وزیر خارجہ کو، پاکستان کی طرف سے انڈین پائلٹ کی بھارت حوالگی سمیت، خطے میں کشیدگی کم کرنے کے لیے کی جانے والی کاوشوں سے آگاہ کیا۔ انہو ں نے کہاکہ امریکہ، پاکستان اور ہندوستان کے مابین تمام تصفیہ طلب امور پر مذاکرات کے دوبارہ آغاز کیلئے اپنا کردار ادا کرے ۔ دونوں رہنماؤں نے افغان امن عمل پر تعاون جاری رکھنے پر اتفاق کیا،افغان امن عمل میں پاکستان کی طرف سے جاری سہولت کاری پر بھی گفتگو ہوئی۔فریقین کا امریکہ کے خصوصی نمائندے برائے افغانستان زلمے خلیل زاد کے متوقع دورہ پاکستان کے دوران افغان امن عمل پر ابتک ہونے والی پیش رفت پر تبادلہ کرنے پر اتفاق کیا ۔ وزیر خارجہ نے کہاکہ انٹرا افغان مذاکرات اس مفاہمتی عمل کا اہم جزو ہیں ۔وزیر خارجہ مخدوم شاہ محمود قریشی نے امریکی اور پاکستانی قیادت کے مابین روابط کے فروغ پر زور دیا۔
