لاڑکانہ(این این آئی) پاکستان پیپلزپارٹی کے چیئرمین بلاول بھٹو زرداری نے کہاہے کہ مولانا فضل الرحمان ہماری ٹریننگ میں آجائیں تو ملک کیلئے بہتر ہوگا۔پیر کو مولانا فضل الرحمان کے بیان کے جواب میں پیپلزپارٹی کے چیئرمین بلاول بھٹو زرداری نے نو ڈیرو ہاؤس میں تقریب سے خطاب میں کہا کہ مولانا فضل الرحمان کی عزت کرتا ہوں،
میں نوجوان ہوں اور میری نئی سوچ ہے لہٰذا مولانا صاحب ہماری ٹریننگ میں آجائیں تو ملک کیلئے بہتر ہوگا۔ انہوں نے کہاکہ خواتین کو معاشی طور پر بااختیار بنانا چاہتے ہیں، خواتین کو سیاسی طور پر بھی بااختیار بنانا چاہتے ہیں۔بلاول بھٹو نے کہا کہ سندھ کے مسائل کا حل کسی ایک فرد کے پاس نہیں بلکہ ہم سب کو ملکر سندھ کے مسائل کے حل کیلئے کام کرنا چاہیے، ترقیاتی بجٹ کس طرح اور کہاں خرچ ہونا چاہیے، اس پر علاقے کے لوگوں کی رائے ضروری ہے۔انہوں نے کہاکہ بینظیر انکم سپورٹ پروگرام سندھ حکومت کا نہیں پورے پاکستان کا پروگرام ہے۔یاد رہے کہ گزشتہ روز جمعیت علمائے اسلام (ف) کے امیر مولانا فضل الرحمان نے کہا تھا کہ بلاول بھٹو کو تھوڑی سی سیاست کرنے دیں، وہ آئیڈیل باتیں کرتے ہیں۔انہوں نے کہا تھا کہ میں نے زرداری صاحب سے کہا کہ بلاول بھٹو زرداری کو میری شاگردی میں لائیں، زرداری صاحب نے تو بہت کچھ سیکھا مجھ سے، اب بلاول کو بھی ذرا لائیں۔دوسری جانب بلاول کی شاگردی کے معاملے پر جمعیت علمائے اسلام (ف) کے رہنما حافظ حسین احمد کا رد عمل میں کہنا تھا کہ آصف زرداری بلاول کو فضل الرحمان کو دیں گے نہ شیخ رشید کے حوالے کریں گے کیوں کہ بلاول، آصف زرداری کا اثاثہ ہیں وہ انہیں سنبھال کے رکھیں گے۔حافظ حسین احمد نے کہا کہ بلاول، آصف زرداری کے پاس رہے تو ہی ان کی سیاست کی گاڑی چلے گی۔
