جیکب آباد( آن لائن) بے رحم بیٹوں نے بوڑھے باپ کو گھر سے نکال دیا، ضعیف باپ تین روز پولیس ہیڈ کوارٹر روڈ پر بے یارومدد گار زندگی گذارنے پر مجبور۔ تفصیلات کے مطابق جیکب آباد میں بے رحم اور نافرمان بیٹوں نے اپنے ضعیف باپ کو گھر سے نکال دیا ہے ، جعفرآباد محلہ کا رہائشی بوڑھا شخض ہادی بخش ابڑو پولیس ہیڈ کوارٹر روڈ پر گذشتہ تین روز سے بے یارومددگار بیٹھا ہوا ہے، نافرمان بیٹوں کی جانب سے گھر سے نکالے گئے بوڑھے باپ ہادی بخش ابڑو
نے صحافیوں کو روتے ہوئے شکایت کی کہ میری اولاد نافرمان ہے جو مجھے روڈ پر تپتی دھوپ میں چھوڑ گئی ہے، مجھے فالج ہے اس لیے میں چلنے پھرنے سے بھی قاصر ہوں ، گذشتہ تین روزسے بے یارومددگار سڑک کے کنارے بیٹھے ضعیف کی حکومت سمیت کسی سماجی تنظیم نے کوئی مدد نہیں کی بیماریوں میں مبتلا ضعیف شخص کا اس طرح سڑک کے کنارے بے یارومددگار بیٹھنے سے اس کی زندگی کو خطرہ ہے ۔
