اسلام آباد(آن لائن)وزیر اعظم عمران خان سے سابق کپتان جاوید میانداد نے ملاقات میں 27 سال پہلے جیتے گئے ورلڈ کپ کی یادوں کو تازہ کیا۔اسلام آباد میں ہونے والی اس ملاقات میں دونوں عظیم کھلاڑیوں نے انیس سو بانوے کے عالمی کپ کی خوشگوار یادوں کو دہرایا۔

ملاقات میں باہمی دلچسپی کے امور پر بھی تبادلہ خیال کیا گیا۔وزیراعظم کے معاون خصوصی ذوالفقار بخاری بھی ملاقات میں موجود تھے۔ ملاقات میں اوور سیز پاکستانیوں سے متعلق امور پر تبادلہ خیال کیا گیا۔واضح رہے کہ عمران خان کی قیادت میں پاکستان کو 1992کا تاریخی ورلڈ کپ جیتے 27 برس بیت گئے ہیں۔ فائنل میں پاکستانی ٹیم نے انگلینڈ کو 22رنز سے شکست دے کر پہلی بار ورلڈ کپ اپنے نام کیا تھا۔فائنل میچ میں وسیم اکرم کو عمدہ کارکردگی کا مظاہرہ کرنے پر میچ کا بہترین کھلاڑی قرار دیا گیا تھا۔ انضمام الحق طبیعت نازسازی کے باوجود کپتان کے کہنے پر میدان میں اترے اور 35 گیندوں پر چار چوکوں کی مدد سے 42رنز کی جارحانہ اننگز کھیلی، وسیم اکرم نے بھی 18گیندوں پر چار چوکوں کی مدد سے 33رنز بنائے۔وسیم اکرم نے ایلن لیمب اور اگلی ہی گیند پر کرس لیوز کو پویلین کی راہ دکھا کر انگلش بلے بازی کی کمر توڑ دی۔دو اہم بلے بازوں کے آوٹ ہونے کے بعد انگلش ٹیم سنبھل نہ سکی اور پوری ٹیم 49.2اوورز میں 227بنا کر آوٹ ہوگئی تھی۔