اسلام آباد (مانیٹرنگ ڈیسک)10روپے کا کرنسی نوٹ آئندہ دو سال کے اندر یکسر ختم کر کے اس کی جگہ 10 روپے کا سکہ رائج کرنے کا فیصلہ ، نقل سے بچنے کیلئے 10روپے کے سکے میں سکیورٹی کے 3نئے فیچرز بھی رکھے جائیں گے ۔روزنامہ دنیا کے مطابق سٹیٹ بینک کے حکام نے بتایاکہ 10روپے کے کرنسی نوٹ کے استعمال کی مدت زیادہ سے زیادہ 2سال ہوتی ہے اور اس کی تیاری پر لاگت 3روپے ہے ۔

اس کے مقابلے میں دھات کے سکہ کے استعمال کی میعاد 25سے 40سال ہوتی ہے اور 10روپے مالیت کے سکہ پر لاگت 8روپے ہوگی۔ 10روپے کے کرنسی نوٹ کی نقل تیار کرنا بھی آسان ہے جبکہ 10روپے کے جعلی سکہ کی تیاری ناممکن ہے ۔ تین دہائیاں پہلے رائج کئے گئے سکوں کی تیاری پر لاگت80پیسے تھی اور اب ان کو پگھلاکر نئے سکوں میں ڈالا جا رہا ہے تو دھات کی مالیت 3روپے تک پہنچ گئی ۔