اسلام آباد (این این آئی)وزیر خارجہ شاہ محمود قریشی نے کہاہے کہ ہندوستان سیاسی مقاصد اور انتخابات کے لیے جنوبی ایشیا کے امن شدید خطرات سے دوچار کر رہا ہے،پاکستان خطے میں امن و استحکام کا خواہاں ہے تاہم ہم اپنی سالمیت پر سمجھوتہ نہیں کر سکتے۔ منگل کو وزیر خارجہ مخدوم شاہ محمود قریشی نے امریکی سیکرٹری آف سٹیٹ مائیک پومپیو سے ٹیلیفونک رابطہ کیا

جس میں خطے میں امن و امان کی صورتحال پر تبادلہ خیال کیا گیا۔وزیر خارجہ مخدوم شاہ محمود قریشی نے امریکی سیکرٹری آف سٹیٹ کو بھارت کی طرف سے لائن آف کنٹرول کی خلاف ورزی اور حکومت پاکستان، پارلیمنٹ اور عوامی جذبات سے آگاہ کیا۔وزیر خارجہ نے کہاکہ ہندوستان سیاسی مقاصد اور انتخابات کے لیے جنوبی ایشیا کے امن شدید خطرات سے دوچار کر رہا ہے ۔مخدوم شاہ محمود قریشی نے کہا کہ پاکستان خطے میں امن و استحکام کا خواہاں ہے لیکن ہم اپنی سالمیت پر سمجھوتہ نہیں کر سکتے۔وزیر خارجہ مخدوم شاہ محمود قریشی نے کہاکہ ہم ہندوستان کے عزائم سے پہلے ہی بین الاقوامی برادری کو آگاہ کر چکے تھے ۔مخدوم شاہ محمود قریشی نے کہا کہ پاکستان نے پلوامہ واقعہ کے بعد ھندوستان کی طرف سے دھمکیوں کے باوجود، انتہائی ذمہ دارانہ رویہ اختیار کیا ہے ۔مخدوم شاہ محمود قریشی نے کہاکہ ہندوستان کی اس جارحیت سے افغانستان میں قیام امن کے حوالے سے کی جانے والی مشترکہ کاوشیں متاثر ہو سکتی ہیں ۔مخدوم شاہ محمود قریشی نے کہا کہ بھارت کا یہ جارحانہ اقدام انتہائی قابل مذمت ہے اور ہم توقع کرتے ہوں کہ امریکہ اس سلسلے میں اپنا کردار ادا کریگا۔