ا سلام آباد(این این آئی)وفاقی وزیر اطلاعات و نشریات چودھری فواد حسین نے کہاہے کہ ساری پی ٹی وی ایک طرف ہے اور ایم ڈی پی ٹی وی ایک طرف ہیں۔ میڈیا سے گفتگو کرتے ہوئے وزیر اطلاعات نے کہاکہ کمیٹی کے تمام اراکین نے ایم ڈی کو ہٹانے کا کہا ہے ۔ انہوں نے کہاکہ کمیٹی اپنی سفارشات وزیر اعظم کو دے گی۔فواد چوہدری نے کہا کہ ایم ڈی پی ٹی وی نے تبدیل ہونا ہی ہے۔ انہوں نے کہا کہ ایم ڈی پی ٹی وی نے معاملہ ہائی جیک کر رکھا ہے۔ انہوں نے کہاکہ ایک ایم ڈی نہیں ہے اس کے پیچھے اور بھی لوگ ہیں۔

فواد چودھری نے شاعرانہ رد عمل کا اظہا ر کرتے ہوئے کہاکہ ’’ہیں کواکب کچھ نظر آتے ہیں کچھ‘‘۔انہوں نے کہاکہ جب تک چیرمین نہیں ہوگا بورڈ آف ڈائریکٹرز کیسے کام کریگا۔ وزیراطلاعات نے کہا کہ پی ٹی وی انتظامیہ کمیٹی میں بھی نہیں آتی،اس طرح معاملات کیسے چلیں گے۔ انہوں نے کہاکہ 23 دن سے پی ٹی وی ہیڈ کوارٹرز بند ہے ایم ڈی وہاں بھی نہیں جا سکتے ۔ انہوکں نے کہاکہ ایم ڈی کا عہدہ ختم ہو چکا ہے نئے ایم ڈی کا اشتہار بھی دیا جا چکا ہے۔ انہوں نے کہاکہ ایم ڈی پی ٹی وی کو ازخود استعفیٰ دے دینا چاہیے۔