اسلام آباد(اے این این ) وفاقی وزیر اطلاعات و نشریات فواد چوہدری نے کہا ہے کہ وزیر اعظم ہاؤس میں ایسے غیر منتخب لوگ موجود ہیں جن کو سیاست کا پتہ نہیں ۔تفصیلات کے مطابق بدھ کو پاکستان ٹیلی ویژن(پی ٹی وی)ایمپلائز یونین کی جانب سے ادارے کے منیجنگ ڈائریکٹر (ایم ڈی)کے خلاف جاری احتجاج کے دوران صورت حال اس وقت دلچسپ ہوگئی جب وفاقی وزیر اطلاعات فواد چوہدری ملازمین سے اظہار یکجہتی کے لیے احتجاج میں شامل ہوگئے۔

احتجاج کے دوران وزیر اطلاعات کی آمد پر مظاہرین نے گو ایم ڈی گو کے نعرے لگائے ، اس موقع پر وفاقی وزیر فواد چوہدری ایم ڈی پی ٹی وی کی مخالفت میں احتجاج کرنے والے مظاہرین کے ساتھ کھڑے ہوئے اور اپنی ہی حکومت کو تنقید کا نشانہ بنا ڈالا ۔فواد چوہدری نے مظاہرین سے خطاب کرتے ہوئے کہا کہ پی ٹی وی کے مسائل کا ہمیں بخوبی علم ہے، وزیراعظم ہاؤس میں کچھ غیر منتخب لوگ بیٹھے ہیں، جنھیں سیاست کا علم نہیں۔انہوں نے کہا کہ پی ٹی وی کا مسئلہ یہ ہے کہ انتظامیہ نے اپنی تنخواہیں 25، 25 لاکھ کرلی ہیں، میں نے ایم ڈی کو ان کی کارکردگی پر خط بھی لکھا تھا اور انہوں نے ساتھ ہی سوال کیا کہ ایم ڈی پی ٹی وی کو اتنا غصہ کس بات کا ہے۔فواد چوہدری نے مزید کہا کہ پی ٹی وی کے ملازمین اور پینشنرز مارے مارے پھر رہے ہیں، اگر اوپر کی انتظامیہ اپنی اتنی تنخواہیں مقرر کرلے گی تو نیچے نفرت پیدا ہوگی۔خیال رہے کہ پی ٹی وی ایمپلائز یونین گزشتہ 2 ماہ سے میڈیکل الاؤنس کی بندش کے خلاف احتجاج کررہی ہیں جبکہ ملازمین نے 2 ہفتے سے پی ٹی وی ہیڈکوارٹرز کے باہر دھرنا دیا ہوا تھا۔