کوئٹہ (این این آئی)لورالائی میں ڈی آئی جی پولیس کے دفتر میں حملے میں پولیس اہلکاروں سمیت 14 افراد زخمی ہوگئے ، فورسز کی فائرنگ میں 2 حملہ آور مارے گئے۔ منگل کو پولیس کے مطابق کوئٹہ کے علاقہ لورالائی میں ڈپٹی انسپکٹر جنرل پولیس کے دفتر پر نامعلوم مسلح افراد نے حملہ کیا اور فائرنگ کی جب کہ علاقے میں دھماکے کی آواز بھی سنی گئی۔پولیس حکام کے مطابق ڈی آئی جی آفس میں فائرنگ سے 14 افراد زخمی ہوگئے جن میں 8 پولیس اہلکار بھی شامل ہیں جنہیں فوری طبی امداد کیلئے ہسپتال منتقل کردیا گیا ہے
جن میں سے 3 کی حالت تشویشناک بتائی جاتی ہے۔پولیس کے مطابق حملہ اس وقت کیا گیا جب ڈی آئی جی کے دفتر میں پولیس میں بھرتیوں کے لیے انٹرویو جاری تھے، واقعہ کے بعد علاقے میں پولیس سمیت دیگر فورسز کے اہلکاروں کی نفری طلب کرلی گئی ، علاقے کو گھیرے میں لے لیا گیا جب ڈی آئی جی نثار احمد خان سمیت 15 افسران و اہلکاروں کو بحفاظت دفتر سے نکال لیا گیا ۔پولیس ذرائع کے مطابق ڈی آئی جی آفس میں چار مسلح افراد داخل ہوئے اور فائرنگ کی جس کے بعد پولیس کی جوابی فائرنگ سے 2 حملہ آور مارا گئے۔
