لاہور (یوپی آئی) پاکستان مسلم لیگ (ن) کے کارکنوں نے سابق وزیر اعظم نواز شریف سے اظہار یکجہتی کے لئے باقاعدہ اپنا ایک کیمپ جیل کے باہر لگا لیا ہے۔ جس میں لیگی کارکنان سابق وزیر اعظم کی رہائی تک موجود رہیں گے۔ کیمپ کے حوالے سے لیگی کارکنان عدیل ملک اور ملک مقصود احمد سمیت دیگر کا کہنا ہے کہ انہوں نے کیمپ میں رہنے کے لئے بستر سمیت کھانے پینے کی اشیاء رکھ لی ہیں۔ انہیں کیمپ میں سات سال سے زائد عرصہ تک بھی رہنا پڑا تو وہ رہیں گے۔ ان کے قائد جیل میں سزا کاٹیں گے جبکہ وہ جیل کے باہر کیمپ میں سزا بھگتیں گے۔