اسلام آباد (این این آئی) قومی اسمبلی کی قائمہ کمیٹیوں کی چیئرمین شپ کیلئے ناموں کو حتمی شکل دے دی گئی، کمیٹیوں کی چیئرمین شپ کے امیدوار زیادہ ہونے کی وجہ سے حتمی فیصلہ قائد حزب اختلاف کریں گے۔ذرائع ک یمطابق قائمہ کمیٹیوں سے متعلق مشاورت پر قومی اسمبلی میں قائد حزب اختلاف شہباز شریف کی زیرصدارت پارلیمانی ایڈوائزری گروپ کا اجلاس اپوزیشن لیڈر کے چیمبر میں ہوا۔

اجلاس میں احسان اقبال، شاہد خاقان عباسی، خواجہ محمد آصف، مرتضی جاوید عباسی رانا ثنا اللہ، رانا تنویر، خواجہ سعد رفیق، مریم اورنگزیب اور دیگر نے شرکت کی۔مسلم لیگ (ن) کے پارلیمانی ایڈوائزری گروپ کے اجلاس میں قائمہ کمیٹیوں کی چیئرمین شپ کیلئے ناموں کو حتمی شکل دے دی گئی۔ذرائع کے مطابق کمیٹیوں کی چیئرمین شپ کے امیدوار زیادہ ہونے کی وجہ سے حتمی فیصلہ اپوزیشن لیڈر شہباز شریف کریں گے۔قومی اسمبلی کی 38 قائمہ کمیٹیوں سے متعلق حکومت اور اپوزیشن میں قائمہ کمیٹیوں کی تشکیل پر اتفاق رائے کے تحت حکومت کو 20 اور اپوزیشن جماعتوں کو 18 قائمہ کمیٹیوں کی سربراہی ملے گی۔ذرائع نے بتایا کہ پاکستان مسلم لیگ کو پبلک اکاؤنٹس کمیٹی (پی اے سی) سمیت 9 کمیٹیاں دی گئی ہیں، جن میں مواصلات، اطلاعات،ریلوے، سائنس و ٹیکنالوجی، دفاعی پیداوار،وفاقی تعلیم و تر بیت، ٹریڈ کامرس ایں ڈ ٹیکسٹائل، نیشنل فوڈ سیکیورٹی، کشمیر اور گلگت بلتستان کی قائمہ کمیٹیاں شامل ہیں۔پاکستان پیپلزپارٹی کو 6،متحدہ مجلس عمل کو 2 اور عوامی نیشنل پارٹی (اے این پی ) کو ایک قائمہ کمیٹی کی سربراہی ملے گی۔ذرائع کے مطابق اسپیکر قومی اسمبلی کی جانب سے پیر کو قائمہ کمیٹیوں کی تشکیل کے نوٹیفکیشن جاری کیے جائیں گے۔اپوزیشن نے بھی قائمہ کمیٹیوں کے معاملے پر تمام تفصیل پیر کے روز اسپیکر آفس میں جمع کروانے کا فیصلہ کیا ہے۔