پشاور(اے این این ) خیبر پختونخوا میں سرکاری پرائمری اسکول کے سو سے زائد اساتذہ نے انگریزی پڑھانے کی قابلیت نہ ہونے پر قبل از وقت ریٹائرمنٹ لینے کا فیصلہ کرلیا۔محکمہ ایلمنٹری اور سیکنڈری تعلیم کے حکام کے مطابق یہ پیش رفت 4 سال قبل اردو سے انگریزی میڈیم میں تبدیل ہونے کے فیصلے اور محکمہ کے ایک سال قبل تعلیم کے معیار کو بڑھانے کے فیصلے کے نتیجے میں سامنے آئی۔

میڈیا رپورٹس کے مطابق زیادہ تر اساتذہ میڈیم کے تبدیل ہونے اور اصلاحات متعارف کرائے جانے پر قبل از وقت ریٹائرمنٹ لے رہے ہیں۔حکام کا کہنا تھا کہ سرکاری پرائمری اسکولوں میں اساتذہ کی جانب سے قبل از وقت ریٹائرمنٹ بہت کم سامنے آتی تھی۔انہوں نے کہا کہ محکمہ تعلیم نے معیار کو بہتر بنانے کے لیے یہ اقدام لیا اور اساتذہ کی کارکردگی کو بہتر بنانے کے لیے انہیں قبل از وقت ریٹائرمنٹ کا اختیار دیا ہے۔ان کا کہنا تھا کہ محکمہ تعلیم نے معیار کو بہتر بنانے کے لیے مختلف اقدامات کیے ہیں جن میں اسکولوں کے معیار پر نظر رکھنا، اساتذہ کے مسائل کو حل کرنا، ماہانہ تربیت، اساتذہ کا کلاس روم میں جانے سے قبل سبق کی تیاری وغیرہ شامل ہیں۔حکام کا کہنا تھا کہ قبل از وقت ریٹائرمنٹ لینے والے زیادہ تر اساتذہ 1980 اور 1990 کی دہائی میں تعینات کیے گئے تھے جن کے پاس میٹرک یا انٹر کی ڈگری تھی۔انہوں نے بتایا کہ اب صرف گریجویشن کرنے والے افراد ہی اس عہدے کے لیے درخواست دے سکتے ہیں۔پشاور ضلع میں محکمہ تعلیم کے حکام نے بتایا کہ انہیں ہر ماہ 100 سے زائد قبل از وقت ریٹائرمنٹ کی درخواست موصول ہوتی ہے۔ان کا کہنا تھا کہ قبل از وقت ریٹائرمنٹ کی درخواستیں عورتوں سے زیادہ مردوں کی موصول ہوئی ہیں۔انہوں نے کہا حال ہی میں صوبے میں انضمام ہونے والے قبائلی علاقوں میں صورتحال اس سے بھی خراب ہے۔