لاہور( این این آئی )وزیراعلی پنجاب سردار عثمان بزدار نے کہا ہے کہ ساہیوال واقعہ کی تحقیقات کیلئے قائم جے آئی ٹی رپورٹ آج ( منگل) شام 5 بجے تک آجائے گی اورپھر دیکھیں کہ ہم نے کیا کچھ کیا ہے،پرانے پاکستان اور نئے پاکستان کی جے آئی ٹی میں واضح فرق نظر آئے گا ۔پنجاب اسمبلی کے احاطے میں میڈیا سے گفتگو کرتے ہوئے عثمان بزدار نے کہا کہ ساہیوال واقعہ افسوسناک ہے، پنجاب حکومت کی تمام تر ہمدردیاں جاں بحق خلیل کے خاندان کیساتھ ہیں، متاثرہ خاندان کی مکمل دیکھ بھال کی جائے گی۔جب ساہیوال واقعے کی خبر ملی تو اس وقت
میانوالی میں تھا، واقعے کا سننے کے بعد اعلی سطح کی جے آئی ٹی تشکیل دی گئی اور اسے 72 گھنٹے کا وقت دیا۔صحافیوں کے سوالات کا جواب دیتے ہوئے عثمان بزدار نے کہا کہ میں کسی کو اٹھاکر اس طرح پھانسی نہیں لگا سکتا،آج منگل شام پانچ بجے تک رپورٹ کا انتظار کریں پھر مجھ سے سوال کریں۔رپورٹ ملتے ہی اعلی سطح کا اجلاس ہوگا، میں اس معاملے کو خود دیکھوں گا اور ایکشن کرکے دکھاؤں گا۔پرانے پاکستان اور نئے پاکستان کی جے آئی ٹی میں واضح فرق نظر آئے گا، آپ دیکھیں گے کہ ہم نے کیا کچھ کیا ہے۔
