اسلام آباد(آن لائن)متحدہ مجلس عمل کے رہنماؤں نے جماعت اسلامی کی جانب سے ایم ایم اے سے علیحدگی کی خبروں کے بعد اتحاد کو برقرار رکھنے کے لئے دھوڑ دھوپ شروع کردی، ۔ایم ایم اے کے ذرائع کے مطابق جماعت اسلامی کے امیر کی جانب سے ایم ایم اے کو صرف انتخابی اتحاد کہنے پر متحدہ مجلس کے حلقوں میں بحث شروع ہوگئی ہے اور متحدہ مجلس عمل کے سربراہ مولانا فضل الرحمان سے مختلف رہنماؤں کے رابطوں سمیت بعض مذہبی جماعتوں کے رہنماؤں کی
خفیہ ملاقاتیں بھی شروع ہوگئی ہیں ذرائع کے مطابق ایم ایم اے کے رہنما علامہ عارف واحدی نے جماعت اسلامی پاکستان کے سیکرٹری جنرل لیاقت بلوچ سے ملاقات کی ہے جس میں جماعت اسلامی کی مجلس شوریٰ کے فیصلوں سمیت دیگر امور پر گفتگو کی گئی ہے ذرائع کے مطابق جماعت اسلامی کی جانب سے ایم ایم اے کی کارکردگی پر کچھ تحفظات کا اظہار کیا گیا ہے جس میں ایم ایم اے کے سربراہ مولانا فضل الرحمان کی جانب سے خود ایم ایم اے کو غیر فعال کرنے سمیت مختلف مواقع پر ایم ایم اے سے ابتدائی مشاورت تک نہ کرنے پر تحفظات کا اظہار کیا گیا ہے ذرائع کے مطابقع علامہ عارف واحدی نے جماعت اسلامی کے سیکرٹری جنرل کو یہ یقین دہانی کرائی ہے کہ ہم ملکر معاملات کو بہتر کرسکتے ہیں اور اس حوالے سے علامہ ساجد نقوی بھی اپنا کردار ادا کرسکتے ہیں ذرائع کے مطابق ملاقات کے موقع پر علامہ ساجد نقوی سے بھی ٹیلیفونک رابطہ بھی کیاگیا اور انہیں ایم ایم اے اتحاد کو برقرار رکھنے میں اپنا کردار ادا کرنے کا مطالبہ کیا گیا ہے ذرائع کے مطابق علامہ عارف واحدی اورجماعت اسلامی کے سیکرٹری جنرل لیاقت بلوچ سے ملاقات سابق ایم این اے میاں اسلم کے گھر پر ہوئی جس کی علامہ عارف واحدی نے تصدیق کرتے ہوئے کہاکہ سیاسی اتحاد اور جماعتوں میں گفت و شنید اور اونچ نیچ معمول کا حصہ ہے اور اس حوالے سے جلد ہی ایم ایم اے کا سربراہی اجلاس بلایا جائے گا ۔۔۔۔۔اعجاز خان
