لاہور( این این آئی )حکومت نے بجلی اورگیس کے بعد اب پانی مہنگا کرنے کی تیاری کر لی، واسا نے 2 ارب 20 کروڑ کی سبسڈی ختم کرنے کیلئے بزنس پلان تیار کرلیا جس کے تحت تین مرحلوں میں بلوں میں اضافہ کیا جائے گا۔بتایا گیا ہے کہ واسا نے حکومتی سبسڈی سے چھٹکارے اور آپریشن اینڈ مینٹیننس میں خود مختاری کیلئے چھ سالہ بزنس پلان تیار کرلیا۔56 صفحات پر مشتمل بزنس پلان ایم ڈی واسا آئندہ گورننگ باڈی میں پیش کریں گے۔پلان کے پہلے حصے کے مطابق
واسا پہلے تین سالوں میں مرحلہ وار پانی کے بلوں میں اضافہ کرے گا تاکہ 2 ارب 20 کروڑ روپے کی نہ صرف سالانہ حکومتی سبسڈی سے جان چھڑائی جاسکے بلکہ آمد ن میں اضافہ کیا جا سکے۔پلان کے دوسرے مرحلے میں او اینڈ ایم کے علاوہ مشینری بھی تبدیل کرے گا۔علاوہ ازیں واسا غیر ملکی قرضہ کے حصول کے بعد واپسی کا پلان بھی پیش کرے گا۔ ایم ڈی واسا مرتب کردہ پلان آئندہ گورننگ باڈی کے اجلاس میں وزیراعلی پنجاب سردار عثمان بزدار کو پیش کریں گے۔
