اسلام آباد (این این آئی)وزیر اعظم کے معاون خصوصی افتخار درانی نے کہاہے کہ وزیر اعلیٰ سندھ مرادعلی شاہ مجرم ثابت ہوگئے تو پھر بھی سندھ میں گورنر راج نہیں لگایاجائیگا، پیپلز پارٹی کے پاس سندھ اسمبلی میں اکثریت ہے ، وہ اپنا نیاوزیراعلیٰ لاسکتے ہیں۔نجی ٹی وی کے مطابق افتخار درانی نے کہاکہ پیپلز پارٹی ایک وفاق کی پارٹی تھی اور اب میں یہ دعا کررہاہوں کہ پیپلز پارٹی عدالت میں کوئی ایسا ثبوت لیکر آجائے کہ جس سے ثابت ہوجائے کہ ان کی جانب سے کرپشن نہیں کی گئی۔انہوں نے کہا کہ جے آئی ٹی نے اس بات کی شنا خت کی ہے کہ جب مشکوک ٹرانزکشن ہورہی تھیں

تواسٹیٹ بینک نے ایف آئی اے او ر دیگر اداروں کو بتایا لیکن کوئی سرگرمی نہیں دکھائی گئی کیونکہ اداروں پر بھی ان کے لوگ بیٹھے ہوئے تھے۔ انہوں نے کہاکہ آصف زرداری کے فزیو تھراپسٹ مشتاق کے اکاؤنٹ میں 8.1ارب روپے کی ٹرانزکشنز ہوئیں، یہ وہ صاحب ہیں جنہوں نے ایان علی کے ساتھ 88مرتبہ سفر کیاہے۔انہوں نے کہا کہ اگر وزیر اعلیٰ سندھ مراد علی شاہ مجرم ثابت ہوگئے تو سندھ میں گورنر راج لگانے کا امکان نہیں ہے کیونکہ پیپلز پارٹی کے پاس سندھ اسمبلی میں اچھی خاصی اکثریت حاصل ہے ، وہ اپنا نیا وزیر اعلیٰ لیکر آجائیں جو جیل میں نہ ہو اور اپنی حکومت چلائیں۔