اسلام آباد(مانیٹرنگ ڈیسک)راولپنڈی میں سنار کی دکان پر دو روز قبل چوری کرنیوالی لڑکی صدر میں چوڑیاں بیچتے پکڑی گئی، سناروں نے مل کر اس لڑکی کو کیسے پکڑا؟ جان کر آپ کو بھی حیران رہ جائیں گے۔ تفصیلات کے مطابق راولپنڈی کے علاقے طارق روڈ پر ایک لڑکی نے دو روز قبل سنار کی دکان پر چوری کی ، دوسرے دن وہی چوڑیاں صدر میں بیچنے آگئی، سی سی ٹی وی
کی پہلی ویڈیو سناروں نے آپس میں وٹس ایپ گروپ پر شیئر کر رکھی تھی جس کے ذریعے صدر کے سنار نے لڑکی کو پہچان لیا اور فوری طور پر اس سے چوڑیاں برآمد کر لیں۔ اس دوران سنار کی دکان پر اس لڑکی کی ویڈیو بھی بنائی گئی جس میں وہ اعتراف جرم کرتے ہوئے کہہ رہی ہے کہ اس سے غلطی ہوئی اور اس نے اپنی غلطی مان لی ہے۔ ویڈیو بنانے پر لڑکی نے درخواست کی کہ اس کی ویڈیو نہ بنائی جائے ۔ لڑکی کا کہنا تھا کہ اس نے پہلی بار یہ کام کیا ہے اور اس کا کوئی گروپ نہیں۔ ایک سنار نے شک کا اظہار کرتے ہوئے کہا کہ یہ نشے کی عادی معلوم ہوتی ہے تاہم لڑکی نے اس پر تردید کرتے ہوئے کہا کہ اس کی تلاشی لے لی جائے اس کے پاس نشے کیلئے کوئی چیز نہیں۔ تاہم لڑکی کی آنکھوں کے گرد حلقے اور اس کے بولنے کے انداز اور جسمانی ساخت سے معلوم ہو رہا تھا کہ وہ نشے کی عادی ہے ۔ لڑکی نے چوری کی وجہ بتاتے ہوئے کہا کہ اس نے اپنی فیس جمع کروانی تھی اس لئے اس نے چوری کی ۔واضح رہے کہ اس سے قبل بھی مختلف مقامات پر موجود قیمتی اشیا کی دکانوں سے نشے کے عادی افراد اور خواتین چیزیں چوری کرتے پکڑے جا چکے ہیں جن میں زیادہ تعداد نوجوان لڑکے لڑکیوں کی ہے جو کہ آئس نشے کی لت میں مبتلا تھے اور اپنا نشہ پورا کرنے کیلئے چیزیں چرا کر بیچنے پر مجبور ہو گئے تھے۔
