اسلام آباد (نیوزڈیسک) نیب نے العزیزیہ اسٹیل مل کیس میں سزا پانے والے سابق وزیراعظم نواز شریف کو اڈیالہ جیل منتقل کر دیا ٗ منگل کو کوٹ لکھپت جیل میں منتقل کیا جائیگا۔ پیر کو سابق وزیراعظم نواز شریف کے خلاف دو نیب ریفرنسز کا فیصلہ سنا دیا گیا ہے جس میں احتساب عدالت نے انہیں فلیگ شپ ریفرنس میں بری کیا ہے جبکہ العزیزیہ اسٹیل ملز ریفرنس میں 7 سال قید کی سزا سنائی ہے۔میاں نوازشریف نے نیب ریفرنسز کا فیصلہ عدالت میں بیٹھ کر سنا اور فیصلہ سننے کے بعد انہوں نے احتساب عدالت
کے جج ارشد ملک سے اپیل کی کہ انہیں اڈیالہ جیل کی بجائے کوٹ لکھپت جیل لاہور منتقل کیا جائے۔نوازشریف کی اپیل پر نیب پراسیکیوٹر نے مخالفت کی تاہم عدالت نے سابق وزیراعظم کی اپیل پر فیصلہ محفوظ کرلیا۔عدالت نے کچھ دیر بعد فیصلہ سناتے ہوئے نوازشریف کی اپیل منظور کرلی اور انہیں اڈیالہ کی بجائے کوٹ لکھپت جیل منتقل کرنے کا حکم دیا۔نواز شریف کو انتہائی سخت سیکیورٹی میں اڈیالہ جیل منتقل کر دیا گیا ٗ منگل کوانہیں لاہور کی کوٹ لکھپت جیل منتقل کر دیا جائیگا۔
