اسلام آباد(آن لائن)سابق وزیر اعظم میاں محمد نواز شریف کیخلاف دو نیب ریفرنسز العزیزیہ اور فلیگ شپ کا فیصلہ آج پیر کو سنایا جائے گا اور اس موقع پر وفاقی دارالحکومت میں سخت سیکیورٹی انتظامات کئے گئے ہیں ۔ضلعی انتظامیہ اسلام آباد نے احتساب عدالت سمیت شہر بھر میں امن و امان برقرار رکھنے کیلئے خصوصی سکیورٹی پلان تشکیل دے دیا ہے۔
گزشتہ روز ڈپٹی کمشنر اسلام آباد حمزہ شفقات اور ایس ایس پی آپریشن اسلام آباد وقار الدین سید سمیت دیگر سینئر افسران نے بھی احتساب کورٹ کا دورہ کیا اور سیکورٹی انتظامات کا جائزہ لیا ۔ ضلعی انتظامیہ کے مطابق کمرہ عدالت میں مسم لیگ (ن) کے وکلا، رہنماؤں سمیت 15 افراد کو احتساب کورٹ کی طرف سے داخلے کی اجازت دی گئی ہے جبکہ عدالت کے اطراف پولیس کے ایک ہزا ر اہلکار تعینات ہوں گے جبکہ کمرہ عدالت میں نواز شریف کو کلوز پروٹیکشن یونٹ سیکیورٹی فراہم کرے گا۔پولیس ذرائع کے مطابق امن وامان کو برقرار رکھنے کیلئے آنسو گیس کے 400 اضافی شیل، ربڑ کی گولیاں اور ڈنڈ ا بردار 12 اسپیشل اسکواڈز بھی تشکیل دیے گئے ہیں۔ قیدیوں کی 8 وینز سٹی زون کے اہم مقامات پر موجود ہوں گی۔ چاروں زونل ایس پیز اپنے علاقوں میں صورتحال کی مانٹیرنگ کر یں گے۔ شہر کے داخلی و خارجی راستوں پر شام سے ہی پولیس اہلکار تعینات کردئیے گئے ہیں۔ سرکاری و نجی املاک کو نقصان پہنچانے والوں کو پکڑنے کے لئے سادہ کپڑوں میں پولیس اہلکار تعینات ہوں گے۔وفاقی پولیس کے سینئر آٖفیسر کے مطابق آج کسی بھی غیر متعلقہ شخص کو احتساب عدالت نہیں جانے دیا جائے گا۔دوسری جانب ضلعی انتظامیہ کا کہنا ہے کہ ہنگامی صورتحال سے نمٹنے کے لیے رینجرز اور ایف سی کے جوان بھی تیار رہیں گے ۔
