لاہور( این این آئی) مسلم لیگ (ن) کے مرکزی رہنما ورکن قومی خواجہ سعد رفیق نے کہا ہے کہ ملک پر عمران خان کی صورت میںآمریت مسلط ہے ، اپوزیشن کو مل کر دور آمریت کا مقابلہ کرنا پڑے گا،ملک کو بد امنی اور معاشی بحران کی جانب دھکیلا جارہا ہے ، ہمارے اوپر کیس کوئی نہیں بلکہ یہ ایک سیاسی گرفتاری ہے ، کسی صورت سمجھوتہ نہیں کرینگے اور سزا کیلئے تیار ہیں۔

نیب عدالت میں پیشی کے موقع پر (ن) لیگ کے رہنما خواجہ عمران نذیر کی جانب سے خواجہ سعد رفیق کا تحریری بیان میڈیا کو جاری کیا گیا ۔ خواجہ سعد رفیق نے مزید کہا کہ ہمیں سمجھوتہ نہ کرنے کی سزا دی جارہی ہے ،ہمارا جرم جمہوریت، قانون اور آئین کی حکمرانی کی حمایت ہے، میرے شہید والد سے لیکر سلمان رفیق تک جیلیں کاٹیں، ہم عوام کی حکمرانی سے پیچھے نہیں ہٹے، آمریت کے ہر دور میں ہمارے خاندان پر ظلم کیا گیا ، ہمارے والد نے بھی قربانیاں دیں ہم بھی دیں گے ، سمجھوتہ نہیں کریں گے اور سزا کے لئے تیار ہیں۔ انہوں نے کہا کہ نیب الزامات ثابت کرنے کیلئے شواہد ڈھونڈ رہا ہے ، اپوزیشن احتساب کے نام پر بدترین سیاسی انتقام کی زد میں ہے، ملک میں عمران خان کی شکل میں سول آمریت مسلط ہے، پہلے بھی آمریت کامقابلہ کیا اس دور آمریت کا بھی مقابلہ کریں گے،اپوزیشن کو مل کر دور آمریت کا مقابلہ کرنا پڑے گا۔ انہوں نے کہا کہ حکومت کے چار ماہ نا اہلی اور بد نیتی کا عملی مظہر ہیں ، ملک میں بد ترین جمہوریت ہے ۔سعد رفیق نے کہاکہ حکومت نے ہماری پیشی پر رکاوٹیں کھڑی کر کے اوپن کورٹ کو بند کمرے کی عدالت میں بدل ڈالا، وکلا، سائلین اور پرامن کارکنوں کو اوپن کورٹ آنے سے روکنا غیر قانونی ہے، حکومت کو سڑکوں پر رکاوٹیں لگا کر عوام کی زندگی عذاب بنانے کا کوئی حق نہیں، میڈیا نمائندگان کو عدالتی کارروائی سے جبرا روکنا آزادی صحافت پر حکومتی حملہ ہے۔خواجہ سعد رفیق نے کہا کہ ہمارا دامن صاف ہے ،ضمیر مطمئن اور دامن صاف ہے، ہم سر خرو ہوں گے۔