اسلام آباد(مانیٹرنگ ڈیسک)شہباز شریف اگر دیانتدار ہے تو پھر ن لیگ میں کوئی بھی بددیانت نہیں، میں جب کلاشنکوف کیس میں گرفتار ہوا تو میرے کسی نے 3سال تک پروڈکشن آرڈر جاری نہیں کئے، گھر میں ماں کا جنازہ تھا، جنازہ پڑھ کر سلام پھیرا تو پکڑا گیا، میرے پاس تو ماں کے علاوہ کچھ تھا بھی نہیں،اگر واش روم میں چٹخنی نہیں تو اتنا پریشان ہونے کی ضرورت نہیں،

سعد رفیق بڑے باپ کا چھوٹا بیٹا ہے جو پیسوں کیلئے ٹیں ٹیں کر رہا ہے، شیخ رشید کی پریس کانفرنس، سعد رفیق اور شہباز شریف کے پروڈکشن آرڈر کے حوالے سے اعتراض اٹھا دیا۔ تفصیلات کے مطابق وفاقی وزیر ریلوے اور عوامی مسلم لیگ کے سربراہ شیخ رشید احمد نے پریس کانفرنس سے خطاب کرتے ہوئے صحافیوں کے سوال کا جواب دیتے ہوئے کہا کہ شہباز شریف اگر دیانتدار ہے تو پھر ن لیگ میں کوئی بھی بددیانت نہیں۔ شہباز شریف اور خواجہ سعدرفیق کے پروڈکشن آرڈر کے حوالے سے بات کرتے ہوئے شیخ رشید کا کہنا تھا کہ میں جب کلاشنکوف کیس میں گرفتار ہوا تو میرے کسی نے 3سال تک پروڈکشن آرڈر جاری نہیں کئے۔ میرے گھر میں ماں کا جنازہ تھا، جنازہ پڑھ کر سلام پھیرا تو پکڑلیا گیا، میرے پاس تو ماں کے علاوہ کچھ تھا بھی نہیں، اگر واش روم میں چٹخنی نہیں تو اتنا پریشان ہونے کی ضرورت نہیں۔ انہوں نے کہا کہ سعد رفیق بڑے باپ کا چھوٹا بیٹا ہے جو پیسوں کیلئے ٹیں ٹیں کر رہا ہے۔ شیخ رشید نے کہا کہ یہ لوگ پروڈکشن آرڈر پر باہر آتے ہیں منسٹر انکلیو میں اپنی فیملیز کے ساتھ رہتے ہیں اور ان کی فیملیز ان کے معاملات طے کرواتی ہیں۔انہوں نے کہا کہ چوروں کو ہیرو بنا کر پیش کیا جارہا ہے۔ ایک سوال کا جواب دیتے ہوئے انہوں نے کہا کہ اگر تہمینہ درانی شریف خاندان کے معاملات طے کروا رہی ہیں تو اس حوالے سے انہیں کوئی معلومات نہیں۔عمران خان چاہتے ہیں سب چور لٹیرے جیلوں کے پیچھے جائیں۔