اسلام آباد (این این آئی) وزیراعظم عمران خان نے سرمایہ کاروں کو سازگار ماحول فراہم کرنے کے عزم کا اعادہ کرتے ہوئے کہا ہے کہ حکومت کاروبار میں آسانی اور سرمایہ کاروں کو تمام سہولیات فراہم کرنے کیلئے بھرپور اقدامات اٹھائیگی ۔منگل کو تیل و گیس کے شعبہ میں اطالوی ملٹی نیشنل کمپنی ’ای این آئی‘ کے سنٹرل ایشیاء ریجن کے ایگزیکٹو وائس پریزیڈنٹ لوکا وگناتی نے وفد کے ہمراہ وزیراعظم عمران خان سے ان کے آفس میں ملاقات کی
۔ اس موقع پر منیجنگ ڈائریکٹر ای این آئی پاکستان اینجیلو لگرون، کامران اجمل میاں اور شاہین چغتائی بھی ان کے ہمراہ تھے۔ ای این آئی کے ایگزیکٹو وائس پریزیڈنٹ لوکا وگناتی نے وزیر اعظم کو 2000ء سے پاکستان میں تیل و گیس کی تلاش و پیداوار کے حوالے سے اپنی کمپنی کی سرگرمیوں کے بارے میں آگاہ کیا۔ انہوں نے وزیر اعظم کو بتایاکہ ای این آئی پاکستان نے ایسے علاقوں میں مقامی آبادیوں کی ترقی کیلئے کئی منصوبوں میں سرمایہ کاری کی ہے جہاں اس کے پاس تلاش و پیداوار کے لائسنس ہیں اور یہ تعلیم، صحت اور ماحولیات اور سماجی و اقتصادی ترقی میں اپنا کردار ادا کررہی ہے۔ انہوں نے کہاکہ ای این آئی جدید ترین ٹیکنالوجیز کو بروئے کار لاتے ہوئے بالخصوص ایل این جی اور آف شور تلاش و پیداوار میں اپنی کاروباری سرگرمیوں کو مزید وسعت دینا چاہتی ہے۔ وزیر اعظم نے ای این آئی کی طرف سے پاکستان میں کاروبار کو وسعت دینے میں دلچسپی کا خیر مقدم کرتے ہوئے کہا کہ حکومت تیل وگیس کی تلاش وپیداوار سمیت مختلف شعبوں میں موجود وسیع مواقعوں سے استفادہ حاصل کرنے کیلئے سرمایہ کاروں کو سازگار ماحول فراہم کرنے کیلئے پر عزم ہے۔ انہوں نے کہا کہ کاروبار میں آسانی پیدا کرنے اور کاروباری برادری کو ہر ممکن سہولیات کی فراہمی کیلئے بھرپور اقدامات اٹھائے جائینگے۔انہوں نے کہا کہ پاکستان میں تیل وگیس کی تلاش اور پیداوار سے متعلق کمپنیوں کیلئے بہت زیادہ مواقع موجود ہیں جن سے دنیا کی بڑی کمپنیوں کو استفادہ حاصل کرنا چاہئے۔
