اسلام آباد (مانیٹرنگ ڈیسک) وزیراعظم عمران خان نے شیخ رشید کو وزارت اطلاعات کی پیشکش کر دی، لاہور میں وفاقی وزیر ریلوے شیخ رشید احمد نے پریس کانفرنس میں کہا کہ وزیراعظم عمران خان سے کل چار میٹنگز ہوئی ہیں، شیخ رشید نے بتایا کہ وزیراعظم نے کہا کہ وزارت اطلاعات میں آ جاؤ لیکن مجھ میں اتنی ہمت نہیں ہے کہ میں دن رات کام کرتا رہوں،

اس موقع پر شیخ رشید احمد نے کہا کہ وہ لندن میں آٹھ دن سے پکنک پر ہیں میں نے ان سے کہا کہ لندن سے واپس آ جاؤ، جب ایک صحافی نے شیخ رشید احمد سے سوال پوچھا کہ اگر وزیراعظم وزارت کی تبدیلی کا کہیں تو آپ کا ردعمل کیا ہو گا، جس کے جواب میں وفاقی وزیر ریلوے نے کہا کہ میں کہوں گا کہ ’’لو یو، تھینک یو ویری مچ‘‘۔ جب یہ خبر میڈیا پر چلی تو شیخ رشید احمد نے وضاحت کرتے ہوئے کہا کہ فواد چودھری میرے بھائیوں کی طرح ہیں، سوال ہی پیدا نہیں ہوتا کہ فواد چودھری کی جگہ لوں، شیخ رشید احمد نے کہا کہ مجھے وزیراطلاعات بننے کا شوق ہے نہ بنوں گا، ریلوے کا وزیر بننے پر بہت خوش ہوں، فواد میرا بھائی وہی وزیر اطلاعات رہے گا، شیخ رشید احمد نے کہا کہ پکنک والی بات مذاق میں کی تھی، اس موقع پر وفاقی وزیر ریلوے نے کہا کہ دنیا ادھر ادھر ہو سکتی ہے لیکن فواد چودھری کے خلاف کسی سازش میں شریک نہیں ہو سکتا، شیخ رشید احمد نے کہا کہ اب منہ کو تالہ لگا کر رکھوں گا، آپس کی بات کو بھی چلا دیا گیا، شیخ رشید کے بیان پر ردعمل دیتے ہوئے فواد چودھری نے کہا کہ شیخ رشید کے لیے وزارت چھوڑنے کو تیار ہوں۔ فواد چودھری نے اپنے ٹویٹ میں کہا کہ مجھے شیخ رشید احمد کے لیے سیٹ چھوڑ کر خوشی ہو گی ، اس کا فیصلہ وزیراعظم عمران خان کریں گے کہ کون بہتر ہے۔