لاہور ( این این آئی) وزیر اعظم کے مشیر برائے تجارت ،ٹیکسٹائل انڈسٹری ،پیداوار و سرمایہ کاری عبدالرزاق داؤد نے کہا ہے کہ انجینئرنگ مصنوعات ملکی زرمبادلہ میں خاطر خواہ اضافہ کے ساتھ ساتھ مقامی مارکیٹ میں خودکفالت کے حصول کیلئے بھی معاون ثابت ہوتی ہیں،ملک کے موجودہ حالات عارضی ہیں ،چند ماہ تک بہتر ہو جائیں گے ۔

اس امر کا اظہار انہوں نے گزشتہ روز ملت ٹریکٹر کی افریقہ کو برآمدگی کھیپ کی افتتا حی تقریب سے خطاب اور میڈیا سے گفتگو کرتے ہوئے کیا۔عبدالرزاق داؤد نے کہا کہ آج پاکستانی پراڈکٹ ایکسپورٹ ہورہی ہے اور ہم افریقہ کی مارکیٹ میں جارہے ہیں اور جب ٹریکٹر ایکسپورٹ ہوں گے توباقی پارٹس بھی ایکسپورٹ ہوں گے تاکہ سمال انڈسٹری کو فروغ حاصل ہو سکے۔پاکستانی مصنوعات کی برآمد سے آنیوالے دنوں میں ملکی معیشت ترقی کرے گی۔انہوں نے کہا کہ اگر ہم انجینئرنگ پاکستان میں کریں گے تو کاسٹ آف پراڈکٹ کم ہو گی،ہمارا فوکس یہی ہے کہ پاکستان افریقہ میں ایکسپورٹ کرے۔ٹریکٹرز کے بعد موٹر سائیکل بھی ایکسپورٹ ہوں گے۔مشیر وزیر اعظم نے کہا کہ جاپان سے کیپیٹل اور سکلز فنڈ کے لیے جارہا ہوں،پاکستان کے یہ حالات عارضی ہیں لیکن چند ماہ تک ملکی حالت بہتر ہوجائے گی،ہمیں تین بڑے سیکٹر انجینئرنگ ،کیمیکل اور آئی ٹی کو توجہ دینا ہے جبکہ کیمیکل انڈسٹری کو آگے لانا ہے۔انہوں نے اس امر کو خوش آئند قر ار دیا کہ ملت ٹریکٹر کی مختلف مصنوعات یورپ، افریکہ، اسٹریلیا، جنوبی ایشیا کو برامد کی جا رہی ہے۔ اس موقع پر چیئر مین ملت گروپ سکندر مصطفی نے کہا کہ ہماری اعلیٰ معیار کی مصنوعات گلوبل مارکیٹ میں اپنا ایک مقام رکھتی ہیں۔بعد ازاں کمپنی کی جانب سے وزیر اعظم کے خصوصی مشیر برائے کامرس اینڈ انڈسٹری عبد الرزاق داؤد کو کمپنی کے مختلف یونٹس کا دورا کرا یا گیا۔انہوں نے تیار کئے گئے ملت ٹریکٹرز کے 2 ماڈلز کا بھی معائنہ کیااور کہا کہ ملت کی تیار کی جانیوالی مصنوعات عالمی مارکیٹ میں نہ صرف قیمتوں بلکہ معیار کے اعتبار سے بھی مقام رکھتی ہیں۔