اسلام آباد(اے این این) وزیراعظم نے نوجوانوں کیلئے قومی پالیسی لانے کا فیصلہ کرتے ہوئے کہا ہے کہ اگر نوجوان ساتھ نہ دیتے تو آج ہم حکومت میں نہ ہوتے،عثمان ڈار نوجوانوں سے متعلق پالیسی کے لیے بہترین انتخاب ہیں جبکہ وزیراعظم عمران خان کی منظوری کے بعد کابینہ ڈویژن نے عثمان ڈار کے وزیر اعظم کے معاون خصوصی برائے یوتھ افیئرز کا نوٹیفکیشن جاری کر دیا۔
تفصیلات کے مطابق منگل کو وزیر اعظم سے عثمان ڈار نے اسلام آباد میں ملاقات کی۔ وزیر اعظم نے نوجوانوں کے لیے قومی پالیسی لانے کا فیصلہ کرتے ہوئے پالیسی کی تیاری کا ٹاسک عثمان ڈار کو سونپ دیا ہے۔عمران خان نے کہا کہ عثمان ڈار نوجوانوں سے متعلق پالیسی کے لئے بہترین انتخاب ہیں جب کہ نوجوانوں کا حکومت سازی میں کردار نہیں بھول سکتا ہوں،نوجوانوں کو ایسی سہولیات دیں گے جو آج سے پہلے کسی نے نہیں دی ہوں گی۔ ملاقات کے دوران آئندہ چند روز میں نیا پاکستان یوتھ پروگرام بھی لانچ کرنے کا فیصلہ کیاگیا ہے۔ عثمان ڈار کو نیا پاکستان یوتھ پروگرام اور یوتھ پلس پورٹل کی تیاری کی ہدایت کی گئی ہے۔عثمان ڈار نے بطور معاون خصوصی تنخواہ وصول نہ کرنے کا اعلان کرتے ہوئے کہا ہے کہ وہ قومی خزانے پر بوجھ نہیں بنیں گے اور وزیراعظم کے ساتھ مل کر نوجوانوں کو با اختیار بنائیں گے جب کہ پیسہ لیپ ٹاپ پر نہیں بلکہ نوجوانوں پر خرچ کریں گے۔وزیراعظم عمران خان کی منظوری کے بعد کابینہ ڈویژن نے عثمان ڈار کے وزیر اعظم کے معاون خصوصی برائے یوتھ افیئرز کا نوٹیفکیشن جاری کر دیا ہے۔واضح رہے کہ عثمان ڈار کا تعلق سیالکوٹ سے ہے انہوں نے عام انتخابات 2018 میں مسلم لیگ (ن) کے سینئر رہنما خواجہ آصف کے مقابلے میں الیکشن لڑا تاہم کامیاب نہیں ہوسکے۔
