لاہور (مانیٹرنگ ڈیسک) ن لیگ کے امیدوار خواجہ سعد رفیق نے کارکنوں سے خطاب کرتے ہوئے کہا کہ ن لیگ ہزاروں ووٹ سے جیت چکی ہے، ابھی ڈیفنس کے دو پولنگ سٹیشنز رہتے ہیں جن کا رزلٹ نہیں دیا جا رہا ہے اور ہمارے لوگ وہاں انتظار کر رہے ہیں میں حکومت سے اور الیکشن کمیشن سے پوری قوت کے ساتھ یہ مطالبہ کرتا ہوں کہ اس مرتبہ نہ سینہ زوری چلے گی نہ دھاندلی، ہمارے رزلٹ کو فوری ہمارے نمائندوں کے حوالے کریں اگر ہمارے رزلٹ میں رد و بدل کیا گیا
تو سخت ترین احتجاج کیا جائے گا، انہوں نے کہا کہ جو نتائج موصول ہوئے ہیں اس کے مطابق ن لیگ کو واضح برتری حاصل ہے، میں سمجھتا ہوں کہ لوگوں کے فیصلے کو تسلیم کیا جانا چاہیے، ہم نہ کسی کے گلے پڑنا چاہتے ہیں نہ کسی سے جھگڑا کرنا چاہتے ہیں، گزشتہ الیکشن ہمیں جکڑ کر لڑایا گیا، میرے آدمیوں کو پکڑا گیا، جمہوریت پر یقین رکھنے والوں نے ن لیگ کا ساتھ دیا۔ خواجہ سعد رفیق نے دعویٰ کرتے ہوئے کہا کہ وہ 2800 ووٹوں کی لیڈ سے جیت چکے ہیں۔
