لاہور(مانیٹرنگ ڈیسک) وزیراعظم عمران خان اورملک کے سینئر صحافیوں کےمابین دو روز قبل وزیراعظم ہائوس میں ملاقات ہوئی ۔ وزیراعظم عمران خان کی دعوت پر سینئر صحافیوں نے وزیراعظم ہائوس میں عمران خان سے ایک بیٹھک کی جس میں ملک کے معروف اور سینئر صحافی بھی شامل تھے۔ اسی ملاقات میں موجود ملک کے معروف صحافی و تجزیہ کار
ارشاد بھٹی اپنے کالم میں اس ملاقات کی روداد لکھتے ہوئے کہتے ہیں کہ سینئر و معروف صحافی و تجزیہ کارحامد میر نے عمران خان کو مشورہ دیا کہ آپ کو یواین اوجنرل اسمبلی سے خطاب کرنے جانا چاہئے اور خطاب بھی اردو میں کرنا چاہئے لیکن وزیراعظم نے جواب دیا کہ اس وقت جو ملکی حالات ہیں اس میں، میں صرف خطاب کرنے یا صدر ٹرمپ کو ملنے چار دنوں کیلئے نہیں جا سکتا ۔یہیں عمران خان نے پھر کہا کہ ’’ میری اور امریکی وزیرخارجہ کی دہشت گردی پر کوئی بات نہیں ہوئی اورامریکہ سے باعزت تعلقات رکھیں گے ‘‘انہوں نے یہ بھی بتایا کہ میں تو یہ کال سننا ہی نہیں چاہتا تھا،امریکی وزیرخارجہ کو ہمارے وزیر خارجہ سے بات کرنی چاہئے تھی لیکن اپنے فارن آفس کے مجبور کرنے پر بات کی۔اس حوالے سے نجی ٹی وی پروگرام میں گفتگو کرتے ہوئے ڈاکٹر شاہد مسعود نے بھی انکشاف کرتے ہوئے بتایا تھا کہ سینئر صحافیوں سے ملاقات کے دوران عمران خان سے سوال ہوا کہ آپ اقوام متحدہ کیوں نہیں جارہے؟ بلکہ وہاں جائیں اور اردو میں خطاب کریں ، یہ بڑا زبردست ہوگا۔اس پروزیراعظم عمران خان نے بڑا دلچسپ جواب دیا کہ میں وہاں جاکران لوگوں سے ملکر کیا کروں گا؟ وزیراعظم نے کہا کہ آپ سوچیں اگر وہاں میری امریکی صدرٹرمپ سے ملاقات ہوجائے اور وہ مجھے کچھ بول دے اس کے جواب میں کچھ میں نے بول دیا توپھر کیا ہوگا؟کس طرح کے حالات ہوں گے۔سب کوپتا ہے کہ ٹرمپ جیسے بولتا ہے ۔
