اسلام آباد(سی پی پی )موٹروے پر واقع ٹائر شاپس مافیا کا انسانی جانوں سے کھیلنے کا مکروہ دھندہ بے نقاب ہو گیا ہے ۔آئی جی موٹرویز نے ملک بھر کی تمام موٹرویز اور نیشنل ہائی ویز پر موجود ٹائر شاپس سے متعلق تفصیلات طلب کر لیں۔تفصیلات کے مطابق موٹر ویز پر انسانی جانوں سے کھیلنے کا مکروہ دھندے سے متعلق میڈیا میں گزشتہ دنوں سے انکشافات ہو رہے تھے کہ ملوث مافیا چاقو سے شہریوں کی گاڑیوں کے ٹائر کاٹ دیتے ہیں اور پھر شہریوں کو کئی گنا مہنگے ٹائر خریدنے پر مجبور کیا جاتاہے ۔

جس پر آئی جی موٹرویز نے نوٹس لیتے ہوئے متعلقہ حکام سے 48 گھنٹوں میں ملک بھر کی تمام موٹرویز اور نیشنل ہائی ویز پر موجود ٹائر شاپس سے متعلق تفصیلات طلب کر لیں۔ آئی جی کا کہنا تھا کہ تمام زونل کمانڈر چیف پٹرولنگ آفیسرز سے رپورٹ لیں‘موٹر ویز پر چاقو سے شہریوں کی گاڑیوں کے ٹائر کاٹنے کے واقعات رپورٹ ہو رہے ہیں‘ شہریوں کی گاڑیوں کے ٹائر کاٹنے کے بعد 200 فیصد مہنگے ٹائر خریدنے پر مجبور کیا جاتا ہے اس طرح مافیا انسانی جانوں سے کھیل رہا ہے۔