پشاور(سی پی پی ) دہشتگردی کیخلاف جنگ میں ٹانگوں سے محروم ہونیوالے 2بہادر سپاہیوں نے 8 سال بعد دوبارہ فرائض انجام دینا شروع کردیے ہیں۔2009 میں خودکش حملے میں ہیڈ کانسٹیبل سید علی شاہ نے اپنی دونوں ٹانگیں گنوا دیں تاہم بہادر اہلکار نے معذوری کو آڑے نہیں آنے دیا اور مصنوعی ٹانگوں سے قدم بڑھا کر دوبارہ فورس جوائن کر کے نئی تاریخ رقم کردی۔ سید علی شاہ نے گلبرگ تھانے میں ڈیوٹی
شروع کردی ۔اس حوالے سے ان کا کہنا تھا کہ وہ ہر قسم کی قربانی کے لیے تیار ہیں۔بلند حوصلے کا مالک پولیس اہلکار شاہ سعود بھی 2010 میں پشاور کے علاقہ پشتہ خرہ میں ریموٹ کنٹرول بم دھماکے میں اپنی ٹانگ کھو بیٹھا تھا۔ اب 8 سال بعد دلیر سپاہی نے دوبارہ پولیس فورس میں شمولیت اختیار کرنے کو اپنی خوش قسمتی قرار دیا ہے۔ شاہ سعود پشاور کے تھانہ فقیر آباد میں محرر اسٹاف کے ہمراہ ڈیوٹی دینے لگا ہے۔
