اسلام آباد(سی پی پی)این اے 108فیصل آباد سے پی ٹی آئی رہنمافرخ حبیب نے کہا ہے کہ شاہراہ دستور پر علی بابا چالیس چوروں کا احتجاج ہوا،پتہ نہیں چلا کہ کون کس کیخلاف احتجاج کررہا ہے،بہت جلد اڈیالہ جیل کا نام جاتی عمرہ ٹو رکھ دیا جائیگا۔ ان خیالات کا اظہار انہوں نے الیکشن کمیشن کے باہر میڈیا سے گفتگو کرتے ہوئے کیا ۔فرخ حبیب کاکہناتھاکہ این اے 108 فیصل آباد میں عوام نے میرا ساتھ دیا اور عابد شیر علی کو شکست دی۔

عابد شیر علی نے میری کامیابی کیخلاف ہائیکورٹ سے رجوع کیا تھاجس پر میں نے الیکشن کمیشن میں لاہور ہائی کورٹ کا آرڈر جمع کرادیا ہے اور امید ہے الیکشن کمیشن جلدکامیابی کا نوٹیفکیشن جاری کردے گا۔انہوں نے کہاکہ راجہ پرویز اشرف اور ان سے ہارنے والے ایک ساتھ احتجاج کررہے تھے،اپوزیشن کو عمران خان کی کارکردگی کے خوف نے جمع کیا ہے، ان کو مشورہ ہے کہ احتجاج کرنے والے پارلیمنٹ میں آکر بات کریں۔