لاہور ( این این آئی) تحریک انصاف اور مسلم لیگ (ق) کے درمیان وفاق اور پنجاب میں حکومت سازی کے لیے فارمولہ طے پاگیا۔نجی ٹی وی کے مطابق حکومت سازی کے لیے دونوں جماعتوں کے درمیان طے پانے والے معاہدے کے تحت چوہدری پرویز الٰہی اسپیکر پنجاب اسمبلی ہوں گے اور وہ پہلے ہی پنجاب اسمبلی میں خدمات انجام دینے کی خواہش کا اظہار کرچکے تھے۔نجی ٹی وی کے مطابق ذرائع کا کہنا ہے کہ تحریک انصاف مسلم لیگ (ق) کو وفاق

اور پنجاب میں 2، 2وزارتیں بھی دے گی اور وزارتوں کا فیصلہ اسپیکر کے انتخاب کے بعد کیا جائے گا۔یاد رہے کہ مسلم لیگ (ق) کی قومی اسمبلی میں 4اور پنجاب اسمبلی میں 7نشستیں ہیں اور یہ انتخابات کے دوران پی ٹی آئی کی اتحادی جماعت تھی۔قومی اسمبلی میں حکومت بنانے کے لیے کسی بھی جماعت کو 137اور پنجاب اسمبلی میں 149ارکان کی ضرورت ہے، اس وقت تحریک انصاف کی قومی اسمبلی میں 116اور پنجاب اسمبلی میں 123ارکان کی تعداد ہے۔

موضوعات:تحریک انصاف ق لیگ