اسلام آباد(نیوز ڈیسک) پاکستان تحریک انصاف کے مرکزی سیکرٹری اطلاعات و ترجمان فواد چوہدری نے کہاہے کہ نواز شریف اور انکی صاحبزادی ابوظبہی سے آکر اڈیالہ پہنچ گئے، شہباز شریف چیئرنگ کراس پر بھنگڑوں سے لطف اندوز ہوتے رہے،
شہباز شریف نے کل بڑے بھائی کو “نواز تیرے جانثار، سب فرار، سب فرار” کا پیغام دیا،ایون فیلڈ کے بعد العزیزیہ اور فلیگ شپ انوسٹمنٹ ریفرنسز میں بھی شریفوں کا مزید گھناؤنا چہرہ سامنے آنے کو ہے۔ہفتہ کو شہباز شریف کی پریس کانفرنس پرتحریک انصاف کے مرکزی سیکرٹری اطلاعات و ترجمان فواد چوہدری نے ردعمل دیتے ہوئے کہا کہ شہباز شریف کی پریس کانفرنس کل لاہور میں پیش آنے والی خفت مٹانے کی کوشش ہے۔قوم خصوصاً اہل لاہور نے کل “چوروں” کی حمایت میں رچائے گئے تماشے سے مکمل لاتعلقی کا اظہار کیا۔نواز شریف اور انکی صاحبزادی ابوظبہی سے آکر اڈیالہ پہنچ گئے، شہباز شریف چیئرنگ کراس پر بھنگڑوں سے لطف اندوز ہوتے رہے۔شہباز شریف دھونس، لالچ، ترغیب اور دھمکیوں کے باوجود پوری ملک سے چار ہزار افراد اکٹھے نہیں کر سکے۔شہباز شریف نے کل بڑے بھائی کو “نواز تیرے جانثار، سب فرار، سب فرار” کا پیغام دیا۔انتخابی نتائج کے بارے میں شہباز شریف کی گفتگو شکست کا یقین چھپانے کو کوشش ہے۔ملک میں پہلی مرتبہ شفاف انتخابات کے آثار پیدا ہوئے ہیں تو شہباز شریف نے دھاندلی کا شور مچانا شروع کر دیا ہے۔ہمیشہ ایمپائرز ساتھ ملاکر کھیلنے والے اب میدان میں اترنے سے پہلے ہی گھبراہٹ کا شکار ہیں۔ایون فیلڈ کے بعد العزیزیہ اور فلیگ شپ انوسٹمنٹ ریفرنسز میں بھی شریفوں کا مزید گھناؤنا چہرہ سامنے آنے کو ہے۔
