اسلام آباد (مانیٹرنگ ڈیسک)تحریک انصاف میں ٹکٹوں کی غیر منصفانہ تقسیم کے معاملے پر پارٹی ورکرز اور رہنمائوں کا احتجاج جاری ہے اور کئی رہنما پارٹی ٹکٹ نہ ملنے پر آزادامیدوار کے طور پر کھڑے ہو چکے ہیں جبکہ ناراض کارکنوں اور رہنمائوں کو منانے کیلئے بھی تحریک انـصاف کی اعلیٰ قیادت کی جانب سے کوششوں کا سلسلہ جاری ہے۔ گزشتہ روز اس وقت سب حیران رہ گئے

جب پہلی بار عمران خان کی اہلیہ بشریٰ بی بی نے سیاسی طورپر اپنی پہلی کامیاب انٹری دیتے ہوئے ناراض احتجاجی خواتین کو منا لیا۔ عمران خان جو گزشتہ روز لاہور میں اپنے آبائی گھر زمان پارک میں موجود تھے جس وقت ان کے گھر کے باہر ٹکٹ نہ ملنے پر پارٹی کی خواتین نے احتجاج شروع کیا ہوا تھا ۔ اسی دوران عمران خان کی جانب سے ان خواتین کو ملاقات کیلئے گھر میں بلوایا گیا۔ عمران خان کے ساتھ خواتین رہنمائوں کی ہونیوالی اس ملاقات میں عمران خان کی اہلیہ بشریٰ بی بی کی موجود تھیں اور انہوں نے ناراض خواتین سے گفتگو کی اور انہیں قائل کرتے ہوئے منایا۔ عمران خان اور ان کی اہلیہ بشریٰ بی بی سے ملاقات کے بعد میڈیا سے گفتگو کرتے ہوئے تحریک انصاف کی خاتون رہنما فاطمہ عثمان نے کہا کہ بشریٰ بی بی اتنی شفیق اور اتنی پیاری خاتون ہیں کہ ان کا بیان سن کر آنکھوں سے آنسو نکل آئے، بشریٰ بی بی نے عمران خان کی جدوجہد اور اس میں پیش آنیوالی مشکلات کے بارے میں ہمیں بتایا۔سعدیہ سہیل کا کہنا تھا کہ عمران خان کو نئے گھر کی مبارکباد دی ہے اور ہم سب خوش ہیں جب کہ ڈاکٹر زرقا نے کہا کہ ہم عمران خان کی سپہ سالار ہیں اور پارٹی کے لیے بڑھ چڑھ کر انتخابی مہم چلائیں گے۔واضح رہے کہ ٹکٹوں کی تقسیم پر تحریک انصاف میں اعلیٰ سطح پر بھی رہنمائوں کے درمیان اختلافات سامنے آچکے ہیں اور تحریک انصاف اس وقت کئی دھڑوں میں تقسیم ہو چکی ہے۔ حیرت انگیز طور پر کئی حلقوں میں ٹکٹ نہ ملنے والے امیدوار آزاد امیدوار کے طور پر کھڑے ہو چکے ہیں اور یوں ان حلقوں میں تحریک انصاف بمقابلہ تحریک انصاف کی کیفیت شروع ہو چکی ہے۔