لاہور (نیوز ڈیسک)سابق رکن صوبائی اسمبلی سیمل کامران نے پی پی 14سے راجہ بشارت کو ٹکٹ جاری کرنے پر چیئرمین تحریک انصاف کی رہائش گاہ کے باہر دھرنا دے دیا، سیمل کامران نے کہا ہے کہ کیا عمران خان کے پاس پی پی 14سے کوئی اور امیدوار نہیں تھا۔ جمعہ کو سیمل کامران نے عمران خان کی رہائش گاہ کے باہر دھرنا دیا، سابق ایم پی اے سیمل کامران نے کہا کہ پی پی 14میں غلط شخص کو ٹکٹ دیا گیا، راجہ بشارت کو ٹکٹ کیوں دیا؟کیا عمران خان کے پاس
پی پی 14سے کوئی اور امیدوار نہیں تھا، جب تک ہم عوام نہیں جاگیں گے اور ان حکمرانوں کو جھنجھوڑیں گے نہیں ہم ان کے غلام بنے رہیں گے، خان صاحب نے گزشتہ کئی سالوں سے تبدیلی کا نعرہ لگایا، ہم سب نے ان پر بھروسہ کیا، عمران خان کی تبدیلی صرف اقتدار میں پہنچنے کیلئے ہے، خان صاحب نے کہا تھا کہ وہ کسی بھی ایسے شخص کو پارٹی ٹکٹ نہیں دیں گے جو بدکردار ہو گا، خان صاحب آپ نے ایسے شخص کو ٹکٹ جاری کیا جو بدکردار ہے جس کے بارے میں کتابیں چھپ چکی ہیں۔
