گلگت(نیوز ڈیسک)نیب نے قومی خزانے کو نقصان پہنچانے اور غبن کے الزام میں اکاؤنٹنٹ جنرل گلگت بلتستان کے ڈپٹی اکاؤنٹنٹ جنرل اور اکاؤنٹ آفیسر کو گرفتار کر لیا ہے۔ نیب سے جاری بیان کے مطابق گرفتار کئے جانیوالے ملزمان پر الزام ہے کہ انہوں نے محکمہ زراعت گلگت بلتستان کے آفیسران کے ساتھ ملی بھگت کر کے 2012 ء سے 2015 ء تک سرکاری فنڈز میں غبن کیا۔نیب حکام کے مطابق اکاؤنٹنٹ جنرل گلگت بلتستان کے دونوں ڈی اے اوز نے اپنے

اختیارات کا ناجائز استعمال کرتے ہوئے محکمہ زراعت ضلع دیامر کے آفیسرز سے ملی بھگت کی ہے جس کی وجہ سے قومی خزانے کو 2 کروڑ 48لاکھ روپے کا نقصان پہنچا۔ نیب حکام نے دونوں ملزمان ندیم احمد اور ریاض احمد کو نیب کورٹ میں پیش کیا ہے نیب کورٹ نے دونوں ملزمان کے جسمانی ریمانڈ کی منظوری دے دی ہے۔ واضح رہے کہ نیب نے سرکاری خزانے کو نقصان پہنچانے کے جرم میں محکمہ زراعت ضلع دیامر کے تین آفیسروں کوپہلے ہی گرفتار کیا جا چکا ہے۔