اسلام آباد (آن لائن )وفاقی ترقیاتی ادارہ (سی ڈی اے )میٹروپولیٹن کارپوریشن (ایم سی آئی) اورمارگلہ ہلز نیشنل پارک وائلڈ لائف بورڈ کی غفلت اورلاپرواہی کے باعث مارگلہ ہلز نیشنل پارک میں گزشتہ3 دنوں سے لگی آگ پر تاحال قابو نہ پایاجاسکا،جمعہ کی صبح نور پور کے قریب رتہ ہوترکے مقام پر مزید 3 جگہ ہولناک آگ بھڑک اٹھی۔آتشزدگی کے باعث جنگل کا ایک بڑا حصہ جل کر راکھ کا ڈھیر بن گیا،
آگ ارد گرد کے دیہی علاقوں اور سیاحتی و تفر یحی مقام دامن کوہ ،ٹریل تھری ،ٹریل فائیو،ایم ایف 18،ایم ایف 19ایم ایف 11،منال ،فیصل مسجد کے عقب ،سید پور ،بڈوبند ،نوراں دی گلی ،رتہ ہوتر سے ہوتی ہوئی بری امام تک پھیل چکی ہے۔آگ پر قابو پانے کیلئے این ڈی ایم اے کی درخواست پر پاک آرمی کی خدمات حاصل کی گئیں ،پاک آرمی کے2 ہیلی کاپٹرز آگ بجھانے میں مصروف ہیں،جبکہ شعبہ انوائر منٹ کے سوسے زائد اہلکار،متعدد گارڈز،فائر بریگیڈ کی گاڑیوں ،فائرٹینڈرز راستہ نہ ہونے کے باوجودآگ بجھانے کی کوششوں میں مصروف ہیں۔ ڈپٹی ڈائریکٹرانوائر منٹ اختر رسول سمیت 5افراد شدید زخمی ہوگئے۔تفصیلات کے مطابق بدھ کے روز مارگلہ کے جنگلات میں لگی معمولی نوعیت کی آگ نے سی ڈی اے ،ایم سی آئی ،وائلڈ لائف بورڈ اوردیگراداروں کے درمیان اختیارات کی کھینچاتانی اورمیئر اسلام آباد شیخ انصرعزیز کے غیر سنجیدہ رویہ کے باعث پھیلتے پھیلتے پورے علاقے کو اپنی لپیٹ میں لے لیا ہے۔آگ درہ جانگلہ سے دامن کوہ ، سید پور ، درہ ، تلہاڑ موڑ،فیصل مسجد کے عقب ،منال کے عقب سے ہوتی ہوئی اس کے سامنے موجودسڑک، ٹریل تھری ،ٹریل فائیو،ایم ایف 18،ایم ایف 19ایم ایف 11تک پھیل گئی۔آگ کے وسیع پیمانے پر پھیل جانے اورآبادی کے انتہائی قریب پہنچ جانے کے بعد میئر اسلام آباد شیخ انصرعزیز اورچیئر مین سی ڈی اے عثمان اختر باجوہ نے این ڈی ایم اے کے ذریعے پاک آرمی سے آگ پرقابو پانے کی اپیل کی
جس کے بعد گزشتہ روز پاک آرمی ایوی ایشن کے ہیلی کاپٹرز بیمبی بکٹس کا استعمال کرتے ہوئے آگ پر قابو پانے کیلئے مسلسل کوششیں کررہے ہیں،آگ بجھانے کیلئے پانی روال ڈیم سے حاصل کیا جارہا ہے۔دودسری جانب عام شہریوں اورمقامی آبادی کو آگ سے بچانے کیلئے آرمی کے جوان بھی جائے حادثہ پر پہنچ چکے ہیں۔ڈپٹی ڈائریکٹر اختر رسول کا کہنا ہے کہ ہر ممکن کوشش ہے کہ آج رات ہی آگ کو کنٹرول کرلیا جائے ،تاہم اندھیرے اوردشوار گزار علاقہ ہونے کے باعث ہمیں آگ بجھانے میں بہت مشکلات کا سامنا کرنا پڑ رہا ہے ،
جنگل کے اندر رسائی کیلئے فائربریگیڈ یا کوئی بھی ٹرینڈ عملہ نہیں ہے جبکہ آگ جنگل کہ بالکل وسطی علاقے میں لگی ہوئی ہے۔اس حوالے سے چیئر مین مارگلہ ہلز نیشنل پارک وائلڈ لائف ڈاکٹر انیس الرحمن کا کہنا ہے کہ آگ کسی ایک مقام پر نہیں لگی بلکی جگہ جگہ جان بوجھ کر لگائی جارہی ہے ،ہم ایک جگہ آگ کنٹرول کرتے ہیں اتنی دیر میں دوسرے مقام سے آتشزدگی کی اطلاع آجاتی ہے۔انہوں نے کہا کہ خشک جھاڑیوں ،چیڑ کے درختوں اورخشک پتو ں کے باعث آگ تیزی سے پھیلی تاہم امید ہے جلد آگ پر قابو پالیاجائے گا۔
