لاہور (آن لائن)لاہور کی مقامی عدالت میں ایک لڑکی کے 2 شوہر سامنے آ گئے۔ عدالت نے لڑکی کے بیان پر معاملہ حل کر دیا۔ ایڈیشنل سیشن جج ملک تنویر اعوان نے شمعون کی درخواست پر سماعت کی جس میں یہ دعویٰ کیا گیا کہ اس کی کومل سے 2 ماہ پہلے پسند کی شادی ہوئی لیکن نبیل نے زبردستی اپنے پاس رکھا ہوا ہے۔درخواست گزار نے استدعا کی کہ اس کی بیوی کو بازیاب کرایا جائے۔
عدالت کے سامنے کومل نے درخواست گزار کے دعویٰ کو رد کر دیا اور واضح کیا کہ وہ شمعون کو جانتی تک نہیں ، اس کوبلا جواز پریشان کیا جا رہا ہے۔ لڑکی کومل نے عدالت سے استدعا کی کہ اسے شوہر نبیل کے ساتھ جانے کی اجازت دی جائے۔ایڈیشنل سیشن جج نے لڑکی کو اس کی خواہش پر اس کے شوہر کے ساتھ جانے کی اجازت دے دی اور لڑکی کے شوہر ہونے کے دعویدار شخص کی درخواست مسترد کر دی۔
