اسلام آباد( آئی این پی ) ایوان بالا میں پاکستان تحریک انصاف کے سینیٹر محسن عزیز نے وزیر اعظم شاہد خاقان عباسی کے سیکیورٹی روٹ کے باعث انہیں مارگلہ روڈ پر 25منٹ تک روکے جانے پر تحریک استحقاق پیش کر دی جوچیئرمیننے متعلقہ قائمہ کمیٹی کو بھجوا دی ،

سینیٹر محسن عزیز نے کہا کہ وزیر اعظم شاہد خاقان عباسی کے ساتھ امریکہ میں جو سلوک کیا گیا وہ سب کو پتہ ہے لیکن پاکستان میں ان کے لئے سیکیورٹی روٹ لگا پرلوگوں کی تذلیل کی جاتی ہے۔ ایوان بالا میں جمعرات کو اجلاس شروع ہوتے ہی تحریک انصاف کے سینیٹر محسن عزیز اپنی نشست پر کھڑے ہو گئے اورکہا کہ وہ تحریک استحقاق پیش کرنا چاہتے ہیں، چئیرمین نے انہیں تحریک استحقاق پیش کرنے کی اجازت دی تو سینیٹر محسن عزیز نے بتایا کہ انہیں9 مارچ کو رات 8 بجے اسلام آباد میں واک کے دوران پولیس والوں نے روکا ،پولیس والوں نے کہا کہ وزیراعظم کا روٹ لگا ہے ،مجھے مارگلہ روڈ پر راستے سے گزرنے نہیں دیا گیا اور کہا گیا کہ وزیراعظم کا قافلہ گزرنے والا ہے ،میں نے تعارف کروایا کہ میں سینیٹر ہوں جس پر سکیورٹی والوں نے کہا کہ دوسری طرف منہ کرکے کھڑے ہوجاو۔ پچیس منٹ تک میرے ساتھ یہی کچھ ہوتا رہا،میں نے کہا کہ میں نہیں رکوں گا ،چاہے گولی مار دو۔ انہوں نے کہا کہ مشرف کی طرح یہ حکمران بھی تین قافلوں کی صورت میں نکلتے ہیں۔وزیر اعظم کی امریکہ میں جو صورت حال تھی وہ سب کو پتہ ہے لیکن یہاں ان کے روٹ پر ہماری تذلیل کی جاتی ہے۔بطور سینیٹر ہی نہیں بطور پاکستانی بھی ایسا نہیں ہونا چاہئے ،اس صورتحال کے خلاف تحریک استحقاق پیش کرتا ہوں۔چئیرمین سینٹ نے استحقاق منظور کرتے ہوئے معاملہ متعلقہ قائمہ کمیٹی کے سپرد کر دیا